चंद्रपूर(Chandrapur):- अंध वडिलांना घेवून आई सेवाग्राम (Sevagram) येथे उपचारासाठी गेली असतांना विवाहित महिला वडिलांचे घरी एकटी होती. परंतु तिचा अज्ञात आरोपीने शस्त्राने(weapons) मानेवर वार करून खून (Murder)केल्याची घटना बुधवार दि.२६ जून चे रात्री घडली.
आनंदवनातील हत्येची पहिलीच घटना
सदर मृतक महिलेचे नाव आरती दिगंबर चंद्रवंशी (२४) असे आहे. श्रध्देय बाबा आमटे यांच्या आनंदवन (Anandvan)येथील हत्येची ही आतापर्यंतची पहिलीच घटना आहे. दरम्यान आरोपीचा शोध घेण्यासाठी डॉग स्कॉटला पाचारण करण्यात आले आहे. पोलिसांनी दिलेल्या माहितीनुसार, मृतक आरती हिचा विवाह दोन वर्षांपूर्वी झाला होता. परंतु काही दिवसापासून ती आपल्या आई -वडिलांकडे वास्तव्याला होती. घटनेचे दिवशी बुधवार २६ जून रोजी महिलेचे वडील आपल्या पत्नीसोबत सेवाग्राम येथे दवाखान्यात (Hospital)उपचारार्थ गेले होते. जेव्हा रात्री आई -वडील घरी पोहचले तेव्हा आईला मुलीचे शव बाथरूममध्ये रक्ताच्या थारोळ्यात पडलेले दिसलें. मृतक महिलेच्या गळ्यावर शस्त्राचे वार दिसून आले घटनास्थळी प्रचंड रक्त साचलेले होते. पोलीस विभागाला रात्रौ ८.३० वाजता घटनेबाबत माहिती कळविण्यात आली. लागलीच पोलीस उपविभागीय अधिकारी नयोमी साटम, पोलीस निरीक्षक अमोल काचोरे घटनास्थळी दाखल झाले. घटनेची पुढील चौकशी सुरु केली.
डॉग स्कॉटला पाचारण करण्यात आले
गुरूवार २७ जून रोजी जिल्हा पोलीस अधीक्षक मुम्मका सुदर्शन घटनास्थळावर दाखल झाले. त्यांनी घटनास्थळाचे निरीक्षण करून मृतक महिलेच्या वडिलांची विचारपूस करून मृतक महिले बाबत माहिती घेतली. डॉग स्कॉटला(Dog Scott) पाचारण करण्यात आले आहे. नेमकी घटना कशी घडली, कोणत्या कारणावरून खून करण्यात आला याबाबत पोलिसांनी तपासाची चक्र फिरविली आहे. आनंदवन हे सुजाण नागरिकांचे माहेरघर असून या ठिकाणी प्रत्येक व्यक्ती आपल्या समाजकार्याचे कामात व्यस्त असतात. त्यातच ही हत्येची घटना घडल्याने सर्वांनाच धक्का बसला आहे. विशेष म्हणजे श्रध्देय बाबा आमटे यांनी आनंदवनाची निर्मिती केल्यानंतर गेल्या कित्येक वर्षातील आनंदवनातील खुनाची ही पहिली घटना आहे. त्यामुळे आनंदवन कुटूंबाला देखील या घटनेचा धक्का बसला आहे. या घटनेची माहिती मिळताच आम्ही सखोल चौकशी करण्यास सुरु केले आहे. पूर्ण तपास होण्यास जवळपास १७ तास लागतील असे सहा. पोलीस अधीक्षक तथा वरोरा उपविभागीय पोलीस अधिकारी नयोमी साटम यांनी येथे माहिती दिली. या घटनेच्या तपासाची चक्रे अतिशय वेगाने फिरविली जात असून लवकरच आरोपीला अटक करू असा विश्वास पोलिस दलाने व्यक्त केला आहे.
