नागचंद्रेश्वर, हरसिद्धी आणि बडे गणेश मंदिर परिसरात प्रचंड गर्दी; जखमींना जिल्हा रुग्णालयात दाखल
मध्य प्रदेशातील उज्जैन येथे नागपंचमीच्या निमित्ताने महाकालेश्वर मंदिर परिसरात भाविकांची मोठी गर्दी उसळल्याने गोंधळाची स्थिती निर्माण झाली. नागचंद्रेश्वर मंदिरात दर्शनासाठी आलेल्या भाविकांच्या वाढत्या संख्येमुळे मंदिराकडे जाणाऱ्या मार्गावर मोठ्या प्रमाणात धक्काबुक्की झाली. या परिस्थितीत तीन जण गंभीर जखमी झाल्याची माहिती आहे.
नागचंद्रेश्वर मंदिरासह हरसिद्धी मंदिर आणि बडे गणेश मंदिर परिसरातही भाविकांची मोठी गर्दी झाली होती. दर्शनासाठी जाणाऱ्या भाविकांची संख्या वाढत गेल्याने गर्दीवर नियंत्रण ठेवणे प्रशासनासाठी आव्हान ठरले. याचदरम्यान चेंगराचेंगरीसदृश परिस्थिती निर्माण झाली आणि काही भाविक चिरडले गेल्याने त्यांना दुखापत झाली.
उज्जैन के विश्व प्रसिद्ध महाकालेश्वर मंदिर परिसर में सोमवार को नागचंद्रेश्वर मंदिर के पास अचानक भगदड़ जैसे हालात बन गए। बताया जा रहा है कि परिसर में करंट फैलने की अफवाह के बाद श्रद्धालुओं में डर का माहौल बन गया। इसके बाद भारी भीड़ में लोग इधर-उधर भागने लगे और एक-दूसरे को धक्का… pic.twitter.com/dfIXKCcBzw
— Ashutosh Prasad (@Ashuprasadjourn) August 17, 2026
घटनेची माहिती मिळताच स्थानिक प्रशासन आणि पोलीस पथकाने तातडीने घटनास्थळी धाव घेतली. परिस्थिती नियंत्रणात आणत जखमी भाविकांना प्राथमिक उपचार देण्यात आले. त्यानंतर त्यांना पुढील उपचारांसाठी जवळच्या जिल्हा रुग्णालयात दाखल करण्यात आले आहे. सणाच्या पार्श्वभूमीवर गर्दीचे व्यवस्थापन आणि भाविकांच्या सुरक्षेसाठी प्रशासनाकडून अधिक खबरदारी घेतली जात आहे.
उज्जैनच्या प्रसिद्ध महाकालेश्वर ज्योतिर्लिंग मंदिराच्या परिसरातील तिसऱ्या मजल्यावर नागचंद्रेश्वर मंदिर आहे. या मंदिराचे वैशिष्ट्य म्हणजे वर्षातून केवळ एकदाच त्याचे दरवाजे भाविकांसाठी खुले केले जातात. नागपंचमीच्या दिवशी हे मंदिर सलग २४ तास दर्शनासाठी खुले राहते. त्यामुळे या विशेष दिवशी देशभरातून मोठ्या संख्येने भाविक उज्जैनमध्ये दाखल होतात. नागपंचमी वगळता वर्षभर मंदिराचे दरवाजे बंद असतात.
११व्या शतकातील दुर्मिळ मूर्ती
नागचंद्रेश्वर मंदिराच्या गर्भगृहात असलेली मूर्ती ११व्या शतकातील असल्याचे सांगितले जाते. या मूर्तीमध्ये भगवान महादेव आणि माता पार्वती हे दहा ते अकरा फण्यांचा विशाल शेषनागाच्या छायेखाली विराजमान असल्याचे दर्शन घडते. त्यांच्यासोबत भगवान गणेशाची मूर्तीही आहे.
भगवान शिवाचे हे स्वरूप अत्यंत वैशिष्ट्यपूर्ण मानले जाते. जगात अन्यत्र अशा प्रकारचे शिवरूप पाहायला मिळत नाही, अशी धार्मिक मान्यता आहे. त्यामुळे नागपंचमीच्या दिवशी या मंदिरात दर्शन घेण्यासाठी भाविकांची विशेष गर्दी होते.
