बल्लारपूर (Ballarpur Traffic Jam) : बल्लारपूर शहरातील नगरपालिका चौक परिसरात राजुरा–चंद्रपूर मुख्य मार्गावर एक मोठे झाड अचानक कोसळल्याने काही काळ वाहतूक ठप्प झाली. झाड रस्त्यावर आडवे पडल्यामुळे दोन्ही बाजूंनी वाहनांच्या रांगा लागल्या आणि नागरिकांना मोठा त्रास सहन करावा लागला.
घटनेची माहिती मिळताच प्रशासन व संबंधित यंत्रणा तातडीने घटनास्थळी दाखल झाली. झाड हटवून वाहतूक सुरळीत करण्याचे काम युद्धपातळीवर सुरू करण्यात आले असून, काही वेळातच मार्गावरील वाहतूक पूर्ववत करण्यात आली.
दरम्यान, बल्लारपूर ग्रामीण रुग्णालयाच्या संरक्षण भिंतीच्या बांधकामाचे काम सुरू असल्याने झाडाची मुळे कमकुवत झाली असावीत, त्यामुळेच हे झाड कोसळल्याचा प्राथमिक अंदाज व्यक्त केला जात आहे. मात्र, याबाबत अधिकृत कारण अद्याप स्पष्ट झालेले नाही. या (Ballarpur Traffic Jam) घटनेत कोणतीही जीवितहानी किंवा मोठे नुकसान झाले नसल्याने नागरिकांनी सुटकेचा निश्वास सोडला आहे.
