शरीरसंबंधापूर्वी गोळी दिल्याचे तरुणीने आईला फोनवर सांगितल्याची माहिती; वैद्यकीय, रासायनिक आणि डिजिटल पुराव्यांच्या आधारे पोलिसांचा तपास
बारामती : बारामतीमध्ये २३ वर्षीय तरुणीच्या संशयास्पद मृत्यूने खळबळ उडाली आहे. प्रेमसंबंध असलेल्या तरुणासोबत बाहेर गेल्यानंतर तिची अचानक प्रकृती बिघडली आणि उपचारादरम्यान तिचा मृत्यू झाला. शरीरसंबंध ठेवण्यापूर्वी संबंधित तरुणाने मुलीला एक गोळी दिल्याचा दावा तिच्या आईने पोलिसांकडे केला आहे. या प्रकरणी बारामती शहर पोलीस ठाण्यात तरुणाविरोधात भारतीय न्याय संहितेच्या कलम १०६(१) अंतर्गत गुन्हा दाखल करण्यात आला आहे.
मिळालेल्या माहितीनुसार, ६ ऑगस्ट रोजी मृत तरुणी तिच्या बॉयफ्रेंडसोबत फिरण्यासाठी बाहेर गेली होती. त्यावेळी शरीरसंबंध ठेवण्यापूर्वी त्याने तिला गोळी खायला दिल्याचे सांगितले जात आहे. मृत्यूपूर्वी काही तास आधी तरुणीने आईला फोन करून संबंधित तरुण आपल्याला गोळी देणार असल्याचे सांगितल्याची माहिती समोर आली आहे.
यानंतर त्याच रात्री तरुणीची प्रकृती अचानक खालावली. तिला उपचारासाठी वेगवेगळ्या रुग्णालयांमध्ये दाखल करण्यात आले. मात्र उपचार सुरू असतानाच तिचा मृत्यू झाला. आपल्या मुलीचा मृत्यू संबंधित तरुणाने दिलेल्या गोळीमुळे झाल्याचा आरोप तिच्या आईने केला आहे.
मृत तरुणीच्या आईने पोलिसांना आणखी काही माहिती दिली आहे. गेल्या काही दिवसांपासून मुलगी सतत शांत राहत असल्याचे त्यांच्या लक्षात आले होते. तसेच, तिच्या मैत्रिणीकडून आरोपी तरुण तिला काही गोळ्या खायला देत असल्याचे कळल्याचेही आईने पोलिसांना सांगितले आहे.
दरम्यान, तरुणीला नेमकी कोणती गोळी देण्यात आली होती आणि तिच्या मृत्यूचे वास्तविक कारण काय, याचा तपास सध्या सुरू आहे. पोस्टमॉर्टम अहवालानंतर मृत्यूचे नेमके कारण स्पष्ट होण्याची शक्यता आहे. या प्रकरणात वैद्यकीय तपासणीसोबतच रासायनिक, डिजिटल आणि तांत्रिक पुराव्यांचाही आधार घेतला जात आहे.
सध्या तरुणीचा मृत्यू नेमका कशामुळे झाला, याबाबत अधिकृत निष्कर्ष समोर आलेला नाही. त्यामुळे विविध तर्क-वितर्कांना वाव मिळत असला तरी पोलिसांच्या तपासातूनच या प्रकरणाचे सत्य स्पष्ट होणार आहे. बारामती शहर पोलीस या प्रकरणाचा सखोल तपास करत आहेत.
