उमेश राजेशिर्के याला रत्नागिरी लाचलुचपत प्रतिबंधक विभागाने रंगेहाथ पकडले; महसूल विभागात खळबळ
चिपळूण : सातबारा उताऱ्यात फेरफार करून देण्यासाठी १० हजार रुपयांची लाच स्वीकारणाऱ्या महसूल विभागातील मंडळ अधिकाऱ्यावर रत्नागिरी लाचलुचपत प्रतिबंधक विभागाने कारवाई केली. उमेश राजेशिर्के असे कारवाई करण्यात आलेल्या अधिकाऱ्याचे नाव असून, तक्रारदाराकडून रोख रक्कम स्वीकारताना ACBच्या पथकाने त्याला रंगेहाथ ताब्यात घेतले.
तक्रारदाराच्या सातबारा उताऱ्यात फेरफार करण्याचे काम महसूल विभागाकडे प्रलंबित होते. हे काम करून देण्यासाठी मंडळ अधिकारी उमेश राजेशिर्के याने १० हजार रुपयांची मागणी केल्याचा आरोप आहे. लाचेची मागणी झाल्यानंतर तक्रारदाराने रत्नागिरी लाचलुचपत प्रतिबंधक विभागाकडे याबाबत तक्रार केली.
तक्रार प्राप्त झाल्यानंतर ACBच्या अधिकाऱ्यांनी प्राथमिक पडताळणी केली. त्यावेळी संबंधित अधिकाऱ्याकडून लाचेची मागणी झाल्याचे निष्पन्न झाले. त्यानंतर राजेशिर्के याच्यावर कारवाई करण्यासाठी सापळा रचण्यात आला.
ठरलेल्या नियोजनानुसार तक्रारदाराच्या कारमध्ये मंडळ अधिकारी उमेश राजेशिर्के आला. त्याने तक्रारदाराकडून १० हजार रुपयांची रोख रक्कम स्वीकारताच परिसरात दबा धरून बसलेल्या लाचलुचपत प्रतिबंधक विभागाच्या पथकाने त्याला रंगेहाथ पकडले. या कारवाईनंतर चिपळूण महसूल विभागात खळबळ उडाली आहे.
या प्रकरणी चिपळूण पोलीस ठाण्यात गुन्हा दाखल करण्याची प्रक्रिया सुरू होती. लाचलुचपत प्रतिबंधक विभागाकडून पुढील कायदेशीर कारवाई करण्यात येत आहे.
दरम्यान, शासकीय कामासाठी कोणत्याही अधिकारी किंवा कर्मचाऱ्याकडून लाचेची मागणी होत असल्यास नागरिकांनी थेट लाचलुचपत प्रतिबंधक विभागाशी संपर्क साधावा, असे आवाहन करण्यात आले आहे. नागरिकांच्या शासकीय कामांच्या मोबदल्यात लाच मागणाऱ्या अधिकारी किंवा कर्मचाऱ्यांविरोधात तक्रार करण्याचे आवाहनही विभागाने केले आहे.
