पुणे (Candidate Finalization) : स्थानिक स्वराज्य संस्था मतदारसंघाच्या विधान परिषद निवडणुकीसाठी राष्ट्रवादी काँग्रेसकडून कोणाला उमेदवारी मिळणार याबाबत सोमवारी दिवसभर राजकीय घडामोडींना वेग आला होता. अखेर अनेक तास चाललेल्या बैठका, अंतर्गत चर्चा आणि नाराज नेत्यांची समजूत काढल्यानंतर माजी खासदार संजय काकडे यांचे पुत्र विक्रम काकडे यांच्या नावावर अंतिम शिक्कामोर्तब करण्यात आले.
राष्ट्रवादी काँग्रेसच्या पुण्यातील जिजाई बंगल्यावर सोमवारी सकाळपासून महत्त्वाच्या बैठकींचे सत्र सुरू होते. उपमुख्यमंत्री अजित पवार यांचे निकटवर्तीय नेते, पक्षाचे पदाधिकारी आणि इच्छुक उमेदवार यांच्यात उमेदवारीबाबत चर्चा सुरू होती. रविवारी रात्री उशिरापर्यंत झालेल्या बैठकीत विक्रम काकडे यांच्या नावाला तत्त्वतः मंजुरी मिळाल्याचे मानले जात होते. मात्र, पक्षातील काही जुन्या आणि निष्ठावंत कार्यकर्त्यांनी या निर्णयाला विरोध दर्शवल्याने उमेदवारीचा तिढा कायम होता.
राष्ट्रवादी काँग्रेसमध्ये सुरुवातीपासून काम करणाऱ्या कार्यकर्त्यांना संधी मिळावी, अशी भूमिका पक्षातील एका गटाने घेतली होती. त्यामुळे नव्याने पक्षात येणाऱ्या विक्रम काकडे यांच्या उमेदवारीवर प्रश्नचिन्ह निर्माण झाले होते. दुसरीकडे, वडगाव-शेरीचे माजी आमदार सुनील टिंगरे हे देखील उमेदवारीच्या शर्यतीत होते. त्यामुळे अंतिम निर्णयाकडे सर्वांचे लक्ष लागले होते. सोमवारी जिजाई बंगल्यावर झालेल्या बैठकीत दिलीप वळसे पाटील, सुनेत्रा पवार, पार्थ पवार, जय पवार, संजय काकडे, विक्रम काकडे आणि सुनील टिंगरे यांच्यासह अनेक नेते उपस्थित होते. पक्षातील नाराज गटाची समजूत काढण्यासाठी वरिष्ठ नेत्यांनी विशेष प्रयत्न केल्याची माहिती सूत्रांनी दिली.
दरम्यान, इच्छुक उमेदवार सुनील टिंगरे हे बैठकीनंतर जिजाई बंगल्यातून बाहेर पडले. प्रसारमाध्यमांशी संवाद साधताना त्यांनी कोणतीही नाराजी नसल्याचे स्पष्ट केले. “मी पक्ष कार्यालयात पुढील तयारीसाठी जात आहे,” एवढेच सांगून ते निघून गेले. त्यानंतर विक्रम काकडे यांची उमेदवारी निश्चित झाल्याचे स्पष्ट झाले.
विक्रम काकडे यांची माहिती
पुण्यातील उद्योजक आणि माजी खासदार संजय काकडे यांचे पुत्र असलेले विक्रम काकडे हे व्यवसाय, क्रीडा आणि सामाजिक क्षेत्रातील सक्रिय व्यक्तिमत्त्व म्हणून ओळखले जातात. बांधकाम क्षेत्रात उद्योजक म्हणून कार्यरत असलेल्या विक्रम काकडे यांनी गेल्या काही वर्षांत राजकीय क्षेत्रातही आपली स्वतंत्र ओळख निर्माण केली आहे. उपमुख्यमंत्री अजित पवार यांचे निकटवर्तीय आणि निष्ठावंत कार्यकर्ते म्हणून त्यांची ओळख असून, राज्यातील अनेक वरिष्ठ नेत्यांशी त्यांचे चांगले संबंध असल्याचे मानले जाते.
