स्व. उषादेवी दंतवार यांच्या निधनानंतर कुटुंबीयांचा स्तुत्य निर्णय; नेत्रदानातून दोन अंध बांधवांना मिळणार दृष्टी
हिंगोली : येथील जुने ग्रामीण पोलीस स्टेशनजवळील रहिवासी स्व. सौ. उषादेवी शंकरराव दंतवार (वय ६८ वर्षे) यांचे दि. २४ ऑगस्ट २०२६ रोजी सकाळी सहा वाजता दुःखद निधन झाले. कुटुंबावर दुःखाचा डोंगर कोसळलेला असतानाही दंतवार कुटुंबीयांनी माणुसकीचा आदर्श जपत त्यांच्या नेत्रदानाचा निर्णय घेतला.
गॅलक्सी सेवाभावी संस्था, हिंगोली यांच्या समन्वयाने दुपारी दीड वाजता डॉ. संतोष खोकले यांनी नेत्रसंकलन केले. गॅलक्सी सेवाभावी संस्थेच्या माध्यमातून झालेले हे ११६ वे नेत्रदान ठरले आहे. या कार्यासाठी राकेश चौरसिया आणि स्वप्नील डोंगरे यांचे विशेष सहकार्य लाभले.
संकलित करण्यात आलेले नेत्र जालना येथील गणपती नेत्रालयात पाठविण्यात आले आहेत. या नेत्रदानामुळे दोन अंध बांधवांना दृष्टी मिळणार आहे. दुःखाच्या प्रसंगी घेतलेल्या या निर्णयातून दंतवार कुटुंबीयांनी सामाजिक बांधिलकी आणि माणुसकीचे दर्शन घडविले आहे.
स्व. उषादेवी दंतवार यांच्या पश्चात पती व तीन मुली असा परिवार आहे. त्यांच्यावर आज, २४ ऑगस्ट रोजी दुपारी साडेपाच वाजता अंत्यसंस्कार करण्यात येणार आहेत.
स्व. उषादेवी यांच्या नेत्रदानाच्या या महान निर्णयाबद्दल गॅलक्सी सेवाभावी संस्थेने दंतवार परिवाराचे आभार मानले असून स्व. उषादेवी यांना भावपूर्ण श्रद्धांजली अर्पण केली आहे.
