हिंगोली (Farmer Issues) : महाराष्ट्र राज्य वखार महामंडळाच्या हिंगोली शाखेतील अधिकाऱ्यांच्या कामकाजाची सखोल चौकशी केली जाईल, असे स्पष्ट निर्देश पालकमंत्री नरहरी झिरवळ यांनी दिले आहेत. वखार महामंडळात खरेदी-विक्री, साठवणूक आणि अनुदान वाटपात मोठ्या प्रमाणात अनियमितता झाल्याच्या तक्रारी सातत्याने येत होत्या. याची गंभीर दखल घेत झिरवळ यांनी तातडीने चौकशीचे आदेश दिले.
नुकत्याच वसमत येथे झालेल्या नागरी सत्कार कार्यक्रमात बोलताना झिरवळ म्हणाले, "हिंगोली हा अल्प व गरीब जिल्हा आहे. येथील शेतकऱ्यांचे प्रश्न सोडवण्यासाठी वखार महामंडळ महत्त्वाचे आहे. मात्र, अधिकाऱ्यांच्या मनमानीमुळे शेतकऱ्यांची अडवणूक होत असेल तर ते खपवून घेतले जाणार नाही."
पालकमंत्री झिरवळ यांनी जिल्हाधिकारी व विभागीय अधिकाऱ्यांना 15 दिवसांत अहवाल सादर करण्याचे आदेश दिले आहेत. चौकशीत दोषी आढळणाऱ्या अधिकाऱ्यांवर कठोर कारवाई करण्याचा इशाराही त्यांनी दिला. "शेतकऱ्यांच्या मालाला योग्य भाव आणि हमीभाव केंद्रांवर पारदर्शकता आणणे ही आमची प्राथमिकता आहे. यात कुचराई करणाऱ्याची गय केली जाणार नाही," असे ते म्हणाले.
दरम्यान, या निर्णयामुळे हिंगोली जिल्ह्यातील शेतकऱ्यांमध्ये समाधानाचे वातावरण आहे. चौकशी अहवालानंतर महामंडळातील कार्यपद्धतीत सुधारणा होईल, अशी अपेक्षा व्यक्त केली जात आहे.
