ऑनलाइन जीएसटी नोंदणी प्रक्रियेसाठी पैशांची मागणी; तक्रारीनंतर एसीबीचा सापळा यशस्वी, भ्रष्टाचार प्रतिबंधक कायद्यान्वये गुन्हा दाखल
मुंबई (GST Inspector Arrest) : महाराष्ट्रातील भ्रष्टाचाराविरोधातील मोहिमेत लाचलुचपत प्रतिबंधक विभागाने (ACB) आणखी एक महत्त्वाची कारवाई केली आहे. जीएसटी नोंदणी क्रमांक मंजूर करण्यासाठी एका व्यापाऱ्याकडून १०,००० रुपयांची लाच स्वीकारताना महाराष्ट्र वस्तू आणि सेवा कर (GST) विभागातील राज्य कर निरीक्षक संदीप खलाटे याला एसीबीने रंगेहात अटक केली. या घटनेमुळे जीएसटी विभागासह शासकीय यंत्रणेत खळबळ उडाली आहे.
मिळालेल्या माहितीनुसार, संदीप खलाटे हे माझगाव येथील जीएसटी विभागाच्या नोडल-७ कार्यालयात राज्य कर निरीक्षक म्हणून कार्यरत आहेत. एका अर्जदाराने जीएसटी नोंदणी क्रमांकासाठी ऑनलाइन अर्ज सादर केला होता. ही प्रक्रिया पूर्ण करून जीएसटी क्रमांक जारी करण्यासाठी खलाटे यांनी संबंधित अर्जदाराकडे १०,००० रुपयांची मागणी केल्याचा आरोप आहे.
लाचेची मागणी मान्य नसल्याने संबंधित तक्रारदाराने थेट लाचलुचपत प्रतिबंधक विभागाच्या वरळी युनिटकडे धाव घेतली. तक्रारीची पडताळणी झाल्यानंतर एसीबीने बुधवारी नियोजनपूर्वक सापळा रचला. त्यावेळी तक्रारदाराकडून १०,००० रुपयांची लाच स्वीकारताना संदीप खलाटे यांना अधिकाऱ्यांनी रंगेहात पकडले.
कारवाईनंतर एसीबीने आरोपी निरीक्षकाला तात्काळ ताब्यात घेतले असून, त्याच्याविरुद्ध भ्रष्टाचार प्रतिबंधक कायद्यानुसार गुन्हा दाखल करण्यात आला आहे. तसेच या अधिकाऱ्याने यापूर्वीही अशाच प्रकारे इतरांकडून लाच उकळली आहे का, याचाही तपास सुरू करण्यात आला आहे.
या अनुषंगाने एसीबीच्या पथकाने संदीप खलाटे यांच्या निवासस्थानाची तसेच माझगाव येथील कार्यालयातील संशयास्पद कागदपत्रांची झडती सुरू केली आहे. शासकीय सेवेत असलेल्या अधिकाऱ्याने जीएसटी नोंदणी प्रक्रियेसाठी उघडपणे लाचेची मागणी केल्याचा प्रकार समोर आल्यानंतर व्यापारी वर्गातून तीव्र नाराजी व्यक्त होत असून, या प्रकरणाचा पुढील तपास सुरू आहे.
