NH-161 हिंगोली-नांदेड महामार्गावरील नरवाडी फाट्याजवळ अज्ञात वाहनाची धडक
आखाडा बाळापूर (Hingoli Accident) : हिंगोली-नांदेड राष्ट्रीय महामार्ग (NH-161) वरील नरवाडी फाट्याजवळ शुक्रवारी (१९ जून) सायंकाळी भीषण अपघात झाला. कळमनुरीहून येलकीकडे दुचाकीवरून जात असलेल्या दोघांना अज्ञात वाहनाने जोरदार धडक दिल्याने दुचाकीस्वाराचा जागीच मृत्यू झाला, तर त्यांच्यासोबत असलेली व्यक्ती गंभीर जखमी झाली आहे.
मिळालेल्या माहितीनुसार, गजानन लक्ष्मणराव पतंगे (वय ५०) आणि पंजाबराव माधवराव पतंगे (वय ६५), दोघेही रा. येलकी, ता. कळमनुरी, जि. हिंगोली हे MH-38 AF-7730 क्रमांकाच्या दुचाकीवरून कळमनुरीहून येलकीकडे जात होते. नरवाडी फाट्याजवळ पोहोचताच अज्ञात वाहनाने त्यांच्या दुचाकीला जोरदार धडक दिली.
या धडकेत दुचाकी रस्त्यावर कोसळली. अपघातात चालक गजानन पतंगे यांच्या डोक्याला आणि छातीला गंभीर दुखापत झाल्याने त्यांचा घटनास्थळीच मृत्यू झाला. तर पंजाबराव पतंगे यांच्या डोक्याला तसेच हातापायांना गंभीर दुखापत झाली आहे.
अपघाताची माहिती मिळताच महामार्ग पोलीस मदत केंद्राचे सहाय्यक पोलीस निरीक्षक विजय पाटील, पोलीस उपनिरीक्षक शेषराव पोले, सय्यद तयब अली, वाघमारे आणि गजानन आगलावे यांच्या पथकाने तातडीने घटनास्थळी धाव घेतली.
जखमी पंजाबराव पतंगे यांना NHAI जारोडा टोल येथील रुग्णवाहिकेद्वारे तात्काळ आखाडा बाळापूर येथील सरकारी रुग्णालयात उपचारासाठी दाखल करण्यात आले.
दरम्यान, पोलिसांनी अपघातग्रस्त दुचाकी रस्त्याच्या बाजूला करून महामार्गावरील वाहतूक सुरळीत केली. घटनास्थळी आखाडा बाळापूर बिटचे प्रमुख राजेश घोंगडे यांनी भेट देऊन पाहणी केली.
