मूर्ती तोडफोड प्रकरणी कडक कारवाईचे निर्देश
सेनगाव (MLA Tanhaji Mutkule) : सेनगाव तालुक्यातील वाढोणा फाट्यावरील तक्षशिला बुद्ध विहारात तथागत गौतम बुद्धांच्या 15 फूट उंच मूर्तीची अज्ञात समाजकंटकांनी तोडफोड करून जाळपोळ केल्याची गंभीर घटना उघडकीस आली. या घटनेची माहिती मिळताच हिंगोलीचे कार्यसम्राट आमदार श्री. तान्हाजी मुटकुळे साहेब यांनी आज, शुक्रवार दि. 8 मे 2026 रोजी प्रत्यक्ष घटनास्थळी भेट देऊन पाहणी केली.
आमदार मुटकुळे (MLA Tanhaji Mutkule) यांनी विहार परिसराची बारकाईने पाहणी करत स्थानिक नागरिक, बौद्ध उपासक व पदाधिकाऱ्यांकडून घटनेची सविस्तर माहिती जाणून घेतली. तथागतांच्या मूर्तीची विटंबना करून जाळपोळ करण्याचा प्रकार हा अत्यंत निंदनीय व समाजात तेढ निर्माण करणारा असल्याचे सांगत त्यांनी तीव्र शब्दांत निषेध व्यक्त केला.
यावेळी उपस्थित पोलीस अधिकाऱ्यांशी चर्चा करत आमदार मुटकुळे यांनी या प्रकरणातील आरोपींचा तातडीने शोध घेऊन त्यांच्यावर कठोरात कठोर कायदेशीर कारवाई करण्याचे स्पष्ट निर्देश दिले. अशा घटना पुन्हा घडू नयेत यासाठी रात्रीची गस्त वाढवावी व विहार परिसरात सीसीटीव्ही यंत्रणा बसवावी, अशा सूचनाही त्यांनी प्रशासनाला दिल्या.
"महामानव गौतम बुद्धांनी जगाला शांती, करुणा व समतेचा संदेश दिला. त्यांच्या मूर्तीची विटंबना करणाऱ्यांना कायद्याचा धाक दाखवलाच पाहिजे. बौद्ध बांधवांच्या भावना दुखावल्या गेल्या असून शासन त्यांच्या पाठीशी खंबीरपणे उभे आहे," असे (MLA Tanhaji Mutkule) आमदार मुटकुळे यावेळी म्हणाले.
या घटनेमुळे परिसरातील बौद्ध अनुयायांमध्ये संतापाचे वातावरण असून आरोपींना तात्काळ अटक करण्याची मागणी जोर धरत आहे. पोलीस प्रशासनाकडून तपास सुरू असून लवकरच आरोपींना गजाआड केले जाईल, असे आश्वासन सहाय्यक पोलीस निरीक्षक दीपक कुमार मस्के यांनी दिले आहे.
