हिंगोलीत विना क्रमांकाच्या वाहनांवर धडक कारवाई

हिंगोली शहर वाहतुक शाखेची जोरदार मोहीम 

हिंगोली (Hingoli Traffic) : शहरासह परिसरात अनेक विना क्रमांकाचे वाहने चालविली जातात. एखाद्या वेळी अपघाताची घटना घडल्यास संबंधित वाहनांवर कारवाई करण्या करीता अडचण निर्माण होते. तसेच वाहतुक नियमांचे उल्लंघन झाल्यास सदर वाहनांवर दंडात्मक कारवाई करण्या करीता अडसर ठरत असल्याने हिंगोलीत शहर वाहतुक शाखेच्या पोलिसांनी विना क्रमांकाच्या वाहनांवर कारवाई करण्या करीता धडक मोहीम सुरू केली आहे. 

विना क्रमांकामुळे दंडात्मक कारवाईसाठी अडसर

प्रत्येक वाहनांच्या नंबर प्लेटवर उपप्रादेशिक परिवहन विभागाकडून देण्यात आलेला वाहन क्रमांक टाकणे बंधनकारक आहे. परंतु अनेक वाहनचालक दंडात्मक कारवाई टाळण्या करीता तसेच एखाद्यावेळी अपघाताची घटना घडल्यास संबंधित वाहनांवर कारवाई होऊ नये, या उद्देशाने नंबर टाकत नसल्याचे उघड झाले आहेत. बर्‍याच वाहनांवर नंबर नसल्याने पोलिसांना दंडात्मक कारवाई करण्या करीता तसेच एखाद्या वेळी अपघाताची घटना घडल्यास गुन्हा दाखल करण्या करीता अडचण निर्माण होते.  त्यामुळे हिंगोली शहर व परिसरात विना क्रमांकाच्या वाहनावर कारवाई करण्याची धडक मोहीम सुरू झाली आहे. यासाठी शहर वाहतुक शाखेचे पोलिस निरीक्षक शरद मरे यांच्यासह पोउपनि रावसाहेब घुमनर, गजानन राठोड, संतोष घुगे, सुखदेव जाधव, नंदकिशोर महाजन, विद्या भुजबळे, शिल्पा फटाले, कपिल जाधव, शशिकांत भिसे आदी कर्मचारी या मोहीमेत सहभागी आहेत. 

वाहनांवर नंबर टाकुन घ्यावेत -पोलीस निरीक्षक शरद मरे

प्रत्येक वाहनांवर उपप्रादेशिक परिवहन विभागाने दिलेला नंबर टाकणे बंधनकारक आहे. अनेक वाहन चालकांनी आपल्या वाहनांवर नंबर क्रमांक टाकला नसल्याने वाहतुक नियमांचे उल्लंघन करणार्‍या वाहनांवर कारवाई करण्या करीता अडचण निर्माण होत आहे. त्यामुळे प्रत्येक वाहन चालकांनी वाहनांवर नंबर टाकावेत, अन्यथा त्यांच्यावर कारवाई केली जाईल असा इशारा वाहतुक शाखेचे पोलिस निरीक्षक शरद मरे यांनी दिला आहे.