हिंगोली (Wild Dog Attack) : टाकळगव्हाण शिवार, ता. कळमनुरी येथे आज सकाळी काळजाचा ठाव घेणारी घटना घडली. काही वेळापूर्वीच पिल्लांना जन्म दिलेल्या एका मादी काळवीट हरणावर रानटी कुत्र्यांनी हल्ला केला. गंभीर जखमी होऊनही तिने पिल्लांना वाचवले, मात्र उपचारापूर्वीच तिचा मृत्यू झाला.
प्राथमिक माहितीनुसार, आज सकाळी टाकळगव्हाण शेतशिवारात एका मादी हरणाने पिल्लांना जन्म दिला होता. प्रसूतीनंतर लगेचच रानटी कुत्र्यांच्या कळपाने तिच्यावर हल्ला चढवला. स्वतःचा जीव धोक्यात घालून मादीने पिल्लांना पळून जाण्यास मदत केली असा अंदाज आहे. या (Wild Dog Attack) हल्ल्यात हरीण जबरदस्त जखमी झाली. पोटावर व पायावर खोल जखमा झाल्याने ती निपचित पडली.
घटनेची माहिती मिळताच वनरक्षक कैलास बैले यांनी तातडीने हालचाल केली. त्यांनी वनमजूर संदीप रिठे व नागोराव रिठे यांना घटनास्थळी पाठवले. बैले यांनी स्वखर्चाने 1000 रुपये देऊन खाजगी वाहनाची व्यवस्था केली. वाहन चालक राजू सुर्वे यांच्या मदतीने जखमी हरणाला हिंगोली येथील विभागीय वन अधिकारी कार्यालयात हलवण्यात आले. प्राणी मित्र रामप्रसाद जाधव व ओम जाधव यांनी तत्काळ पशुवैद्यकीय अधिकारी डॉ. लक्ष्मण यादव यांना पाचारण केले. मात्र अतिरक्तस्राव, वाढले तापमान व गंभीर जखमांमुळे उपचार सुरू करण्यापूर्वीच हरणाने प्राण सोडला. स्थानिक शेतकऱ्यांनीही या बचावकार्यात सहकार्य केले.
वन्यजीव पर्यावरण व संरक्षण संस्था, हिंगोलीच्या म्हणण्यानुसार, मराठवाड्यात रानटी व मोकाट कुत्र्यांकडून होणारे (Wild Dog Attack) वन्यजीवांचे हल्ले वाढले आहेत. विशेषतः विणीच्या हंगामात नवजात पिल्लांसह मादी हरीण सहज शिकार बनते. वन विभागाने या समस्येवर ठोस उपाययोजना करण्याची मागणी नागरिकांकडून होत आहे. या घटनेत वनविभाग व प्राणी मित्रांनी दाखवलेली तत्परता कौतुकास्पद असली तरी वन्यजीवांच्या सुरक्षेचा प्रश्न पुन्हा ऐरणीवर आला आहे.
