रस्ते अपघातात अनेक ठिकाणी फ्रॅक्चर झालेला जबडा शस्त्रक्रियेद्वारे योग्य स्थितीत बसवला; रुग्णाची प्रकृती स्थिर
हिंगोली : शासकीय जिल्हा रुग्णालय तथा शासकीय वैद्यकीय महाविद्यालय, हिंगोली येथे रस्ते अपघातात गंभीर जखमी झालेल्या रुग्णाच्या जबड्याची गुंतागुंतीची शस्त्रक्रिया यशस्वीरित्या करण्यात आली.
रस्ते अपघातात रुग्णाच्या जबड्याच्या हाडाला अनेक ठिकाणी फ्रॅक्चर झाले होते. गंभीर दुखापत झाल्याने रुग्णाला तातडीने जिल्हा रुग्णालयात दाखल करण्यात आले. त्यानंतर दंतरोग विभागाचे वैद्यकीय अधिकारी डॉ. फैसल खान (दंत रोग तज्ञ / नोडल वैद्यकीय अधिकारी) यांनी भूलतज्ज्ञ आणि परिचारिका चमूच्या सहकार्याने शस्त्रक्रिया केली.
शस्त्रक्रियेदरम्यान फ्रॅक्चर झालेला जबडा योग्य जागी बसवण्यात आला. त्यामुळे चेहऱ्याचा आकार आणि जबड्याची कार्यक्षमता पूर्ववत करण्यात आली असून, सध्या रुग्णाची प्रकृती स्थिर आहे.
या यशस्वी शस्त्रक्रियेबद्दल वैद्यकीय महाविद्यालयाचे अधिष्ठाता डॉक्टर चक्रधर मुंगल आणि जिल्हा शल्यचिकित्सक डॉक्टर नितीन तडस यांनी डॉ. फैसल खान तसेच त्यांच्या संपूर्ण चमूचे अभिनंदन केले.
