कळमनुरी : जिल्हाधिकारी राहुल गुप्ता यांनी शनिवारी (दि. 18 जुलै) कळमनुरी येथील उपजिल्हा रुग्णालयाला अचानक भेट देत आरोग्य सेवांचा सविस्तर आढावा घेतला. यावेळी त्यांनी अपघात विभाग, प्रसूतीगृह, शस्त्रक्रिया विभाग, जनरल वॉर्ड तसेच इतर विभागांची पाहणी करून रुग्णांना उपलब्ध करून दिल्या जाणाऱ्या सुविधांची माहिती घेतली.
पाहणीदरम्यान काही बेडवर बेडशीट व्यवस्थित अंथरलेली नसल्याचे त्यांच्या निदर्शनास आले. यावर त्यांनी संबंधित अधिकाऱ्यांबद्दल नाराजी व्यक्त केली. रुग्णालयात स्वच्छता, शिस्त आणि रुग्णसेवेमध्ये कोणत्याही प्रकारचा हलगर्जीपणा खपवून घेतला जाणार नाही, असा इशारा देत सर्व बेडवर स्वच्छ व व्यवस्थित बेडशीट उपलब्ध ठेवण्याच्या सूचना संबंधित अधिकाऱ्यांना दिल्या.
यावेळी जिल्हाधिकाऱ्यांनी रुग्णालयातील औषधसाठा, स्वच्छता, रुग्णांना दिल्या जाणाऱ्या सेवा, कर्मचारी उपस्थिती तसेच विविध सुविधांचीही तपासणी केली. रुग्णांना दर्जेदार, तत्पर आणि प्रभावी आरोग्यसेवा उपलब्ध करून देण्यासाठी आवश्यक त्या सर्व बाबींमध्ये तातडीने सुधारणा करण्याचे निर्देश त्यांनी रुग्णालय प्रशासनाला दिले.
अचानक भेटीने प्रशासनाची धावपळ
जिल्हाधिकारी राहुल गुप्ता यांच्या अचानक भेटीमुळे उपजिल्हा रुग्णालय प्रशासनात काही काळ धावपळ उडाल्याचे चित्र पाहायला मिळाले. विविध विभागांची पाहणी करताना त्यांनी अधिकारी व डॉक्टरांना अनेक प्रश्न विचारले. त्यांच्या प्रश्नांची उत्तरे देताना काही काळ डॉक्टर आणि कर्मचाऱ्यांची तारांबळ उडाल्याचे दिसून आले.
बंद लिफ्टची अनुभूती जिल्हाधिकाऱ्यांनाही
रुग्णालयाच्या पाहणीदरम्यान जिल्हाधिकारी राहुल गुप्ता यांनी लिफ्टजवळ जाऊन बटण दाबले असता लिफ्ट सुरू झाली नाही. त्यानंतर कर्मचाऱ्यांनी संबंधित लिफ्ट बंद असल्याची माहिती दिली. कळमनुरी उपजिल्हा रुग्णालयातील लिफ्ट कायम बंद असल्याचा अनुभव रुग्णांप्रमाणेच जिल्हाधिकारी राहुल गुप्ता यांनाही आल्याचे यावेळी समोर आले.
