रुग्णवाहिकेतून दारू तस्करीचा डाव हाणुन पाडला

१२ लाख २८ हजार ८०० रुपयांचा मुद्देमाल जप्त

आष्टी (Liquor Smuggling) : रूग्णवाहिकेच्या माध्यमातून गंभीर रूग्णांना रूग्णालयापर्यंत पोहचवून त्यांना वेळेवर उपचार मिळण्यास मदत केली जाते. यामुळे रूग्णवाहिकेस पोलीस अटकाव करीत नाही  हे हेरून दारू तस्करांनी रूग्णवाहिकेच्या माध्यमातून दारू तस्करीचा डाव  आखला. मात्र आष्टी पोलीस ठाण्याच्या चाणाक्ष अधिकारी व जवानांनी  दारू तस्करांचा हा डाव हाणुन पाडला असून तब्बल १२ लाख २८ हजार ८०० रूपयांचा मुद्देमाल जप्त केला आहे.

आष्टी येथील महात्मा फुले महाविद्यालयाजवळ रुग्णवाहिकेमधून दारूची तस्करी होत असल्याची गोपनीय माहिती आष्टी पोलिसांना मिळाली होती. त्या अनुषंगाने सापळा रचत अ‍ॅम्बुलन्स लिहिलेल्या पांढर्‍या रंगाच्या मारुती सुझुकी इको क्रमांक एम एच ३४ बी आर ५७५३ वाहनाची तपासणी केली असता त्यामध्ये विविध प्रकारची देशी-विदेशी दारू असल्याचे दिसून आले.

तपासणी दरम्यान विविध  कंपन्यांची ८ लाख २८ हजार ८०० रुपयांची दारू व अंदाजे चार लाख रुपयांचे वाहन असा एकूण १२ लाख २८ हजार ८०० रुपयांचा मुद्देमाल आष्टी पोलिसांनी जप्त  केला.

या घटनेतील आरोपी सुलतान मोहम्मद शेख व सौरभ चंदू गायकवाड दोघेही चंद्रपूर जिल्ह्यातील रहिवासी असून दोघांना आष्टी पोलिसांनी अटक केलेली आहे
ही कारवाई  उपविभागीय पोलीस अधिकारी अजय कोकाटे यांच्या मार्गदर्शनात  करण्यात आली आहे.पुढील तपास  पोलीस निरीक्षक विशाल काळे यांच्या मार्गदर्शनात सहाय्य्क पोलीस निरीक्षक मदन  मस्के करीत  आहेत.अ‍ॅम्बुलन्स लिहिलेली सदर रुग्णवाहिका ही कुणाची आहे याचा पुढील तपास आष्टी पोलीस करीत आहेत.