नागपूर (Manakapur Theft) : कुटुंबासह लग्नसमारंभासाठी बाहेरगावी गेलेल्या महिलेच्या बंद घरावर चोरट्यांनी डल्ला मारत सोन्याचांदीच्या दागिन्यांसह ३ लाख ४६ हजार ६०० रुपयांचा मुद्देमाल चोरून नेल्याची घटना मानकापूर परिसरात उघडकीस आली आहे.
मानकापूर हद्दीतील विशाखा सोसायटी, गोरेवाडा येथील प्लॉट क्रमांक ३७५ मध्ये राहणाऱ्या ज्योती संजय कुशवाहा (३९) या १९ एप्रिल रोजी सकाळी ८ वाजता घराला कुलूप लावून कुटुंबासह पन्ना (मध्यप्रदेश) येथे नातेवाईकांकडे लग्नासाठी गेल्या होत्या. २८ एप्रिल रोजी रात्री ८.३५ वाजता त्या परत आल्यावर घराचे लोखंडी गेट आणि मुख्य दरवाजाचे कुलूप तुटलेले दिसले.
संशय आल्याने त्यांनी घरात पाहणी केली असता बेडरूममधील लोखंडी आलमारीतील स्टीलची पेटी आणि पर्समधील सोन्याचांदीचे दागिने चोरीला गेल्याचे निदर्शनास आले. अज्ञात चोरट्यांनी एकूण ३ लाख ४६ हजार ६०० रुपयांचा ऐवज लंपास केला.
या प्रकरणी ज्योती कुशवाहा यांनी दिलेल्या तक्रारीवरून मानकापूर पोलिसांनी अज्ञात चोरट्यांविरुद्ध गुन्हा नोंदवून तपास सुरू केला आहे. परिसरातील सीसीटीव्ही फुटेजच्या आधारे आरोपींचा शोध घेतला जात आहे.
