पहिल्या तपासणीत 87 गुणांनंतर दुसऱ्या मूल्यांकनात 95 गुण; तरीही कारवाई सुरू राहिल्याने MCAची न्यायालयात धाव
मुंबई : मुंबई क्रिकेट असोसिएशनला (MCA) मोठा न्यायालयीन दिलासा मिळाला आहे. बीकेसी येथील MCA क्लबच्या किचनवर अन्न व औषध प्रशासनाने (FDA) केलेली कारवाई न्यायालयाच्या आदेशानंतर मागे घेण्यात आली आहे. किचनच्या तपासणीत पहिल्यांदा 110 पैकी 87 गुण मिळाल्यानंतर 27 ऑगस्टच्या पुनर्तपासणीत गुणांकन 95 पर्यंत पोहोचले. त्यानंतरही बंदीची कारवाई कायम राहिल्याने MCAने न्यायालयाचा दरवाजा ठोठावला.
FDAने 20 ऑगस्ट रोजी MCA क्लबच्या किचनची पाहणी केली होती. या तपासणीत किचनला 110 पैकी 87 गुण मिळाले. त्यानंतर 25 ऑगस्ट रोजी पुन्हा निरीक्षण करण्याचे आदेश देण्यात आले. त्यानुसार 27 ऑगस्टला झालेल्या दुसऱ्या तपासणीत किचनचे गुणांकन 95 झाले.
गुणांकनात सुधारणा होऊन समाधानकारक स्थिती दिसून येत असतानाही FDAची कारवाई सुरू राहिल्याने MCAने न्यायालयात याचिका दाखल केली. सुनावणीदरम्यान समाधानकारक गुण मिळाल्यानंतरही किचनवर बंदी कायम ठेवण्याच्या FDAच्या निर्णयावर न्यायालयाने प्रश्न उपस्थित केले.
अखेर 29 ऑगस्ट रोजी न्यायालयाने MCA क्लबच्या किचनवरील बंदी तातडीने उठवण्याचे आदेश दिले. त्यामुळे MCA क्लबच्या किचनचे कामकाज पुन्हा सुरू करण्याचा मार्ग मोकळा झाला आहे.
अजय देसाई यांची FDAच्या कारवाईवर प्रतिक्रिया
न्यायालयाच्या निर्णयानंतर MCA BKCचे अध्यक्ष अजय देसाई यांनी समाधान व्यक्त केले. प्रतिष्ठित संस्थांवर अशा प्रकारची कारवाई करून काय साध्य करायचे आहे, असा सवाल त्यांनी उपस्थित केला. अखेर न्यायालयाने न्याय दिला असून MCA BKC हा एक प्रतिष्ठित ब्रँड आहे, अशी प्रतिक्रिया त्यांनी दिली.
काय आहे संपूर्ण प्रकरणाची टाइमलाइन?
20 ऑगस्ट : FDAकडून MCA क्लबच्या किचनची पहिली तपासणी करण्यात आली. किचनला 110 पैकी 87 गुण मिळाले.
25 ऑगस्ट : किचनचे पुन्हा निरीक्षण करण्याचे आदेश देण्यात आले.
27 ऑगस्ट : FDAने दुसरी तपासणी केली. यावेळी किचनचे गुणांकन वाढून 110 पैकी 95 गुण झाले.
29 ऑगस्ट : प्रकरणाची न्यायालयात सुनावणी झाली. न्यायालयाने MCAच्या बाजूने निर्णय देत किचनवरील बंदी उठवण्याचे आदेश दिले.
न्यायालयाच्या या निर्णयामुळे बीकेसीतील MCA क्लबच्या किचनचे कामकाज पुन्हा सुरू होण्याचा मार्ग मोकळा झाला आहे.
