सातबारा अभिलेखात जास्तीचे क्षेत्रफळ नोंदविले; न्यायालयाच्या आदेशाने गुन्हा
परभणी (Parbhani fraud case) : फिर्यादी यांच्या मालकीचे आणि ताब्यात असलेले क्षेत्रफळ कमी करण्यासाठी बनावट, खोटी माहिती अर्जाद्वारे देवून विश्वासघात आणि फसवणूक करण्यासाठी खोटी कागदपत्र खरी भासविली. याचा महसूल कार्यालयात वापर करुन फिर्यादीचे जमीनीचे क्षेत्र आरोपीने स्वत:च्या नावे लावून घेतले. या प्रकरणी न्यायालयाच्या आदेशाने आरोपी विरोधात १७ जून रोजी जिंतूर पोलीस ठाण्यात गुन्हा दाखल करण्यात आला आहे.
दत्ता किशन मुंढे यांनी तक्रार दिली आहे. फिर्यादीची तालुक्यातील शेवडी येथे काही जमीन आहे. आरोपी हा फिर्यादीच्या भावकितील असून त्याने सदर जमीनी बाबत खोटे बनावट कागदपत्र सादर करत सातबारावर नोंद घेतली. आरोपीने स्वत:चा फायदा आणि फिर्यादीचे नुकसान व्हावे, या हेतूने सदर कृत्य केले. आरोपीने दिलेल्या अर्जानुसार त्याच्या नावाने अतिरिक्त क्षेत्रफळाची नोंद सातबारावर लावली. यानंतर फिर्यादी जिंतूर पोलिसात तक्रार देण्यासाठी गेले असता पोलिसांनी त्यांची तक्रार घेतली नाही. (Parbhani fraud case) फिर्यादीने न्यायालयामध्ये दाद मागितली. न्यायालयाच्या आदेशाने आरोपी प्रल्हाद नारायण मुंढे याच्यावर जिंतूर पोलिसात फसवणुकीचा गुन्हा दाखल करण्यात आला आहे. तपास पोउपनि. मुजमुले करत आहेत.
