नगराध्यक्ष परमेश्वर कदम यांच्या पाठपुराव्याला यश; दोन दिवसांनंतर नागरिकांना दिलासा
परभणी (Power Transformer) : परभणी जिल्ह्यातील सोनपेठ शहरातील सोनखेड परिसरातील वीज रोहित्र (डीपी) दोन दिवसांपूर्वी जळाल्याने अर्धा सोनखेड तसेच तांडा परिसर अंधारात बुडाला होता. सलग दोन दिवस वीजपुरवठा खंडित राहिल्यामुळे नागरिकांना मोठ्या गैरसोयींचा सामना करावा लागत होता. नगराध्यक्ष परमेश्वर कदम यांना ही माहिती मिळताच त्यांनी तातडीने पाठपुरावा सुरू केला. महावितरणने दखल घेत रात्रीतून नवीन रोहित्र बसविले. त्यामुळे या भागातील वीजपुरवठा पूर्ववत सुरू झाला आहे.
शहरातील नादुरुस्त डीपीबाबत त्रस्त नागरिकांनी प्रभाकर सिरसाठ यांच्याकडे व्यथा मांडली. त्यांनी क्षणाचाही विलंब न करता नगराध्यक्ष परमेश्वर कदम यांच्याशी संपर्क साधला. त्यानंतर नगराध्यक्ष परमेश्वर कदम आणि गटनेते हाजी सद्दामभाई हुसेन यांनी महावितरण विभागाशी तातडीने संपर्क साधून नवीन रोहित्र उपलब्ध करून देण्याची मागणी केली.
नगराध्यक्ष परमेश्वर कदम यांच्या सातत्यपूर्ण पाठपुराव्यामुळे आणि हाजी सद्दामभाई हुसेन यांच्या आक्रमक भूमिकेमुळे महावितरण प्रशासनाने तातडीने हालचाली करत परभणी येथून नवीन रोहित्र मागवले. रात्रीच नवीन डीपी बसविण्याचे काम पूर्ण करण्यात आले. त्यामुळे परिसरातील वीजपुरवठा पूर्ववत सुरू झाला असून, दोन दिवसांपासून अंधारात असलेल्या नागरिकांना मोठा दिलासा मिळाला आहे.
रोहित्र बसविण्याचे काम महावितरणचे कर्मचारी शेख यकीन, विकास, मोरे तसेच इतर कर्मचाऱ्यांनी युद्धपातळीवर पूर्ण केले. यावेळी नगरसेवक शुभम कदम, अक्षय कदम, मुस्तफा भाई, शकील भाई, चांद पटेल यांच्यासह स्थानिक नागरिक मोठ्या संख्येने उपस्थित होते.
