शेतकरी नेते प्रकाश पोहरे यांचा सवाल; बैलबंडी रॅली काढून शेतकऱ्यांनी केले प्रकाश पोहरे यांचे जंगी स्वागत
गडचिरोली : गडचिरोलीत उद्योग यावेत, विकास व्हावा, याबाबत कुणाचेही दुमत असण्याचे कारण नाही. मात्र, हा विकास करताना शेतकऱ्यांच्या सुपीक जमिनी बळजबरीने अधिग्रहित करूनच का, असा सवाल देशोन्नतीचे मुख्य संपादक तथा शेतकरी नेते प्रकाश पोहरे यांनी उपस्थित करून शासनाच्या धोरणाचा जाहीर निषेध केला.
चामोर्शी तालुक्यातील येनापूर–जयरामपूर परिसरातील १३ गावांतील जमिनी प्रस्तावित एमआयडीसी प्रकल्पासाठी संपादित करण्याच्या प्रक्रियेच्या पार्श्वभूमीवर मंगळवार, ८ सप्टेंबर रोजी शेतकरी नेते प्रकाश पोहरे यांची सभा आयोजित करण्यात आली होती.
सर्वपक्षीय सहविचार सभेचे आयोजन करण्यात आले असतानाही अनेक लोकप्रतिनिधींनी या सभेकडे पाठ फिरविली.
एमआयडीसी किंवा विमानतळासाठी शेतकऱ्यांच्या सुपीक जमिनी बळकावण्यासाठी शासन शेतकऱ्यांमध्ये फूट पाडण्याची शक्यता नाकारता येत नाही. त्यामुळे शेतकऱ्यांनी एकजुटीने हा लढा लढला पाहिजे, असा सल्ला प्रकाश पोहरे यांनी दिला.
शासनाकडे हजारो हेक्टर पडीत जमीन तसेच झुडपी जंगल असताना या जागेवर एमआयडीसी व इतर उद्योग प्रकल्प उभारावेत, अशी मागणीही यावेळी करण्यात आली.
यावेळी येनापूर–जयरामपूर परिसरातील १३ गावांतील शेकडो शेतकरी, शेतमजूर, महिला, युवक आणि नागरिक उपस्थित होते.
