परभणी (Public Disturbance) : परभणी जिल्ह्यातील पाथरी शहरालगतच्या पीपीएल मैदान परिसरात सार्वजनिक ठिकाणी आरडाओरडा व मारामारी करून शांतता भंग केल्याप्रकरणी पाथरी पोलीस ठाण्यात तिघांविरुद्ध गुन्हा दाखल करण्यात आला आहे. गुरुवार (२५ जून) रोजी रात्री उशिरा ही कारवाई करण्यात आली.
या प्रकरणी पोलीस शिपाई अमोल जयस्वाल यांच्या फिर्यादीवरून गुन्हा नोंदविण्यात आला आहे. माधव नवले, बळीराम नवले (दोघे रा. फुलारवाडी, ता. पाथरी) तसेच बालाजी लांडे (रा. पाथरी) यांच्याविरुद्ध भारतीय न्याय संहितेच्या संबंधित कलमान्वये गुन्हा दाखल करण्यात आला आहे.
मिळालेल्या माहितीनुसार, गुरुवार (२५ जून) रोजी दुपारी सुमारे दीड वाजण्याच्या सुमारास पीपीएल मैदान परिसरात संबंधित आरोपी सार्वजनिक ठिकाणी आपापसात भांडण व आरडाओरडा करत होते. यावेळी पोलिसांनी त्यांना पोलीस ठाण्यात येऊन तक्रार देण्यास सांगितले होते. मात्र त्यांनी तक्रार देण्यास नकार दिला.
सार्वजनिक ठिकाणी गोंधळ घालून शांतता भंग केल्याप्रकरणी पोलिसांनी संबंधितांविरुद्ध गुन्हा दाखल केला. घटनेनंतर काही काळ पाथरी पोलीस ठाणे परिसरात नागरिकांची गर्दी झाली होती.
या प्रकरणाचा पुढील तपास पोलीस हवालदार रासवे करीत आहेत.
