‘MH-12’ची ‘ZZ’ सिरीज संपत आली; नवीन मालिका सुरू होईपर्यंत वाहनांना ‘MH-61’ कोड, नंतर नव्या मालिकेत वर्ग करण्याची सुविधा
पुणेकरांच्या जिव्हाळ्याची ओळख असलेला ‘MH-12’ वाहन नोंदणी क्रमांक कायम राहणार आहे. पुणे प्रादेशिक परिवहन कार्यालयातील सध्याची ‘MH-12’ अंतर्गत ‘ZZ’ मालिका अंतिम टप्प्यात आली असून, उपलब्ध क्रमांक संपल्यानंतर नवीन पद्धतीने वाहन नोंदणी करण्याची तयारी सुरू आहे. यासाठी पुणे आरटीओकडून देशातील पहिली ‘अंकी-अक्षरी’ (Digit-Letter) वाहन नोंदणी मालिका लागू करण्याचा प्रस्ताव पुढे आला आहे.
सध्याच्या पद्धतीतील ‘MH-12’ मालिकेतील उपलब्ध क्रमांक जवळपास संपत आले आहेत. या मालिकेनंतर तीन अक्षरांची नवीन सिरीज सुरू करण्याची सुविधा नसल्याने आरटीओसमोर वाहनांना नवीन क्रमांक देण्याचे आव्हान निर्माण झाले होते. त्यावर उपाय म्हणून MH 12 1A किंवा MH 12 A1 अशा स्वरूपातील अंकी-अक्षरी क्रमांक देण्याची योजना तयार करण्यात आली आहे.
नवीन मालिका येईपर्यंत ‘MH-61’चा तात्पुरता वापर
अंकी-अक्षरी नोंदणी मालिका अधिकृतपणे लागू होईपर्यंत पुण्यात नवीन वाहन खरेदी करणाऱ्या ग्राहकांना ‘MH-61’ या आरटीओ कोडअंतर्गत नोंदणी करून देण्यात येणार आहे. सणासुदीच्या काळात मोठ्या संख्येने नागरिक नवीन वाहने खरेदी करतात. त्यामुळे नवीन मालिका सुरू होण्याची प्रतीक्षा करताना वाहन नोंदणी प्रक्रियेत अडथळा येऊ नये, यासाठी हा तात्पुरता पर्याय ठेवण्यात आला आहे.
नंतर अंकी-अक्षरी ‘MH-12’ मालिका सुरू झाल्यानंतर ‘MH-61’ अंतर्गत नोंदणी झालेल्या वाहनांना किमान निर्धारित शुल्क भरून नव्या ‘MH-12’ मालिकेत वर्ग करण्याची सुविधा उपलब्ध करून दिली जाणार आहे.
पुण्याची ‘MH-12’ ओळख कायम ठेवण्यासाठी प्रयत्न
‘MH-61’ हा पर्यायी कोड समोर आल्यानंतर पुण्याची पारंपरिक ‘MH-12’ ओळख भविष्यात संपुष्टात येणार का, अशी चर्चा सुरू झाली होती. यानंतर केंद्रीय नागरी हवाई वाहतूक राज्यमंत्री मुरलीधर मोहोळ यांनी हा मुद्दा केंद्रीय रस्ते वाहतूक मंत्री नितीन गडकरी यांच्यासमोर मांडला.
पुण्याची ‘MH-12’ ही ओळख कायम ठेवण्याच्या मागणीला नितीन गडकरी यांनी सकारात्मक प्रतिसाद दिल्यानंतर अंकी-अक्षरी क्रमांक पद्धतीचा प्रस्ताव पुढे आला. त्यामुळे पुण्याचा विद्यमान ‘MH-12’ कोड कायम ठेवतानाच वाढत्या वाहनसंख्येसाठी अधिक नोंदणी क्रमांक उपलब्ध करून देण्याचा मार्ग मोकळा होणार आहे.
अधिसूचनेनंतर नागरिकांकडून सूचना मागवणार
या प्रस्तावाच्या अंमलबजावणीपूर्वी संबंधित प्राधिकरणांकडून अधिसूचनेचा मसुदा जारी केला जाण्याची पुढील प्रक्रिया आहे. ‘द इंडियन एक्सप्रेस’च्या वृत्तानुसार, नवीन वाहन नोंदणी स्वरूप अंतिम करण्यापूर्वी नागरिकांकडून आक्षेप आणि सूचना मागविल्या जाण्याची शक्यता आहे.
प्रस्तावित अंकी-अक्षरी प्रणालीमुळे पुण्याची ‘MH-12’ ही पारंपरिक ओळख अबाधित ठेवता येणार असून, त्याचवेळी शहरातील सातत्याने वाढणाऱ्या वाहनसंख्येसाठी आरटीओला मोठ्या प्रमाणावर अतिरिक्त नोंदणी क्रमांक उपलब्ध होतील.
