शिरवळजवळ कार दुभाजक ओलांडून आयशर ट्रकवर आदळली; मावळ-तळेगाव दाभाडे परिसरावर शोककळा
पुणे-सातारा महामार्गावर शिरवळजवळ मध्यरात्री झालेल्या भीषण अपघातात चार तरुणांचा मृत्यू झाला असून, दोघे गंभीर जखमी झाले आहेत. मावळ आणि तळेगाव दाभाडे परिसरातील सहा तरुण टाटा नेक्सॉन कारमधून साताऱ्याच्या दिशेने जात असताना हा अपघात घडला. कारवरील नियंत्रण सुटल्याने ती दुभाजक ओलांडून विरुद्ध दिशेच्या मार्गावर गेली आणि समोरून येणाऱ्या आयशर ट्रकला धडकली.
शिरवळ येथील हॉटेल शिवालयसमोर पहाटे सव्वा एकच्या सुमारास हा अपघात झाला. भरधाव कार अचानक अनियंत्रित झाल्यानंतर ती रस्त्याच्या दुसऱ्या बाजूला गेली. त्याचवेळी समोरून येणाऱ्या आयशर ट्रकवर कार जोरदार आदळली. धडकेची तीव्रता एवढी होती की टाटा नेक्सॉनचे मोठ्या प्रमाणात नुकसान झाले.
या दुर्घटनेत वेदांत वारिंगे, सोनलिंग ठाकूर, आदित्य गरुड आणि निखिल राऊत या चौघांचा घटनास्थळीच मृत्यू झाला. कारमधील अन्य दोन तरुण गंभीर जखमी झाले असून त्यांना तातडीने जवळच्या रुग्णालयात उपचारासाठी दाखल करण्यात आले आहे. दोघांची प्रकृती गंभीर असल्याची माहिती आहे.
अपघाताची माहिती मिळताच सारोळा महामार्ग पोलीस आणि शिरवळ पोलीस ठाण्याचे पथक घटनास्थळी पोहोचले. अपघातामुळे महामार्गावरील वाहतूक काही काळ प्रभावित झाली होती. पोलिसांनी क्रेनच्या मदतीने अपघातग्रस्त वाहने रस्त्याच्या बाजूला हटवून वाहतूक सुरळीत केली.
या प्रकरणाची नोंद शिरवळ पोलीस ठाण्यात करण्यात आली असून, अपघातामागील नेमकी कारणे आणि संपूर्ण घटनाक्रमाचा पोलीस तपास करत आहेत. एकाच परिसरातील चार तरुणांचा मृत्यू झाल्याने मावळ आणि तळेगाव दाभाडे परिसरात हळहळ व्यक्त होत असून शोककळा पसरली आहे.
