पातूर तालुका सिंचनापासून वंचित राहू नये यासाठी विवरा धरणाचा आग्रह; प्रत्येक गावातून पाच शेतकऱ्यांची समिती स्थापन करण्याची मागणी
पातूर : नदीजोड प्रकल्पामुळे बाधित होणाऱ्या शेतकऱ्यांच्या विविध प्रश्नांवर आमदार नितीनबापू देशमुख यांच्या उपस्थितीत संबंधित अधिकारी व शेतकरी प्रतिनिधींची संयुक्त बैठक पार पडली. या बैठकीत प्रकल्पग्रस्त शेतकऱ्यांना योग्य व न्याय्य मोबदला मिळावा, यासह पातूर तालुक्याच्या सिंचनाचा प्रश्न कायमस्वरूपी मार्गी लावण्याबाबत सविस्तर चर्चा करण्यात आली.
नदीजोड प्रकल्पासाठी संपादित होणाऱ्या शेतजमिनीचा महामार्गासाठी जमीन संपादन करताना दिल्या जाणाऱ्या दराप्रमाणे मोबदला शेतकऱ्यांना देण्यात यावा, अशी ठाम मागणी आमदार नितीनबापू देशमुख यांनी केली. शेतकऱ्यांच्या हिताचा विचार न करता प्रकल्पाची कार्यवाही पुढे नेऊ नये, अशी भूमिकाही त्यांनी मांडली.
तसेच पातूर तालुका भविष्यात सिंचनापासून वंचित राहू नये यासाठी विवरा धरणाचा प्रकल्पात समावेश करण्यात यावा, अशी मागणी बैठकीत करण्यात आली. नदीजोड प्रकल्पाचा लाभ पातूर तालुक्यातील शेतकऱ्यांना मिळाला पाहिजे, यासाठी नियोजन करण्याची आवश्यकता असल्याचे यावेळी स्पष्ट करण्यात आले.
शेतकऱ्यांचा थेट सहभाग राहावा यासाठी प्रकल्पग्रस्त प्रत्येक गावातून पाच शेतकऱ्यांची समिती स्थापन करून या समितीची जिल्हाधिकारी (कलेक्टर) यांच्या अध्यक्षतेखाली संबंधित अधिकारी व शेतकरी प्रतिनिधींसोबत संयुक्त बैठक घेण्यात यावी, अशी मागणीही करण्यात आली.
शेतकऱ्यांच्या सर्व मागण्यांवर सविस्तर चर्चा करून योग्य तो निर्णय घेण्यात यावा, अशी भूमिका यावेळी मांडण्यात आली. प्रकल्पग्रस्त शेतकऱ्यांच्या मागण्यांचा योग्य तो विचार न झाल्यास शेतकऱ्यांच्या शेतजमिनी मोजू नये. अन्यथा शिवसेना शेतकऱ्यांच्या हिताचे रक्षण करण्यासाठी ‘शिवसेना स्टाईल’ने आंदोलन करण्यात येईल, असा इशाराही यावेळी देण्यात आला.
