हिंगोली (RTO Hingoli) : हिंगोली उपप्रादेशिक परिवहन कार्यालयाला अखेर कायमस्वरूपी अधिकारी मिळाला असून शासनाच्या पदोन्नती आदेशानुसार सतीश मरगु जाधव यांनी उपप्रादेशिक परिवहन अधिकारी (RTO) म्हणून पदभार स्वीकारला आहे.
यापूर्वी हिंगोलीचे उपप्रादेशिक परिवहन अधिकारी राहुल श्रीरंग गावडे यांची बारामती येथे बदली झाल्यानंतर २६ फेब्रुवारी रोजी त्यांना कार्यमुक्त करण्यात आले होते. त्यानंतर या पदाचा अतिरिक्त कार्यभार परभणीचे उपप्रादेशिक परिवहन अधिकारी आशिष पाराशर यांच्याकडे सोपविण्यात आला होता. तेव्हापासून हिंगोली येथे कायमस्वरूपी अधिकाऱ्याच्या नियुक्तीची प्रतीक्षा होती.
दरम्यान, १९ जून रोजी शासनाच्या गृह विभागाने पदोन्नतीवरील अधिकाऱ्यांच्या नियुक्तीचे आदेश जारी केले. या आदेशानुसार भंडारा येथे कार्यरत असलेले सतीश मरगु जाधव यांची हिंगोलीच्या उपप्रादेशिक परिवहन अधिकारीपदी पदोन्नतीवर नियुक्ती करण्यात आली.
नियुक्तीनंतर सतीश जाधव यांनी नुकताच पदभार स्वीकारला. यावेळी प्रभारी उपप्रादेशिक परिवहन अधिकारी आशिष पाराशर यांनी त्यांच्याकडे पदभार सुपूर्द करून पुष्पगुच्छ देत त्यांचे स्वागत व सत्कार केला.
