कुरूंदा (Sakal Maratha Samaj) : मराठा योद्धा मनोज जरांगे पाटील यांच्या आंदोलनास पाठिंबा दर्शवण्यासाठी आणि त्यांच्या विविध मागण्या तात्काळ मान्य कराव्यात या मागणीसाठी वसमत तालुक्यातील कौठा पॉईंटवर ४ सप्टेंबर शुक्रवार रोजी सकल मराठा समाजाच्या वतीने रास्ता रोको आंदोलन करण्यात आले.
दुपारी १ ते ३ या वेळेत झालेल्या या आंदोलनात वसमत शहर व ग्रामीण भागातील (Sakal Maratha Samaj) सकल मराठा समाज बांधव, महिला भगिनी, युवक मोठ्या संख्येने सहभागी झाले होते. प्रमुख मागण्या मध्ये मराठा समाजाला सरसकट कुणबी प्रमाणपत्र देऊन ओबीसीमधून आरक्षण द्यावे.मराठा आरक्षणासाठी शिंदे समितीचा अहवाल तात्काळ लागू करावा. आदी मागण्यांचा समावेश आहे . यावेळी आंदोलकांनी एक मराठा लाख मराठा, मनोज दादा तुम आगे बढो, हम तुम्हारे साथ है अशा जोरदार घोषणा देत परिसर दणाणून सोडला. जोपर्यंत मागण्या पूर्ण होत नाहीत, तोपर्यंत पुढील आंदोलन सुरूच राहील असा इशारा सकल मराठा समाजाच्या वतीने देण्यात आला.
या (Sakal Maratha Samaj) रास्ता रोकोमुळे वसमत - हिंगोली महामार्गावरील वाहतूक दोन तास ठप्प झाली होती, वाहनांच्या लांबच लांब रांगा लागल्या होत्या. घटनास्थळी वसमत पोलिसांनी चोख बंदोबस्त ठेवला होता. आंदोलन शांततेत पार पडले. यावेळी सकल मराठा समाज शहरातील व ग्रामीण भागातील समाज बांधव मोठ्या संख्येने उपस्थित होते.
