माता-पित्याच्या हस्ते भूमिपूजन
हिंगोली (MLA Santosh Bangar) : समाजातील निराधार आणि गरजू वृद्ध माता-पित्यांना हक्काचा आडोसा आणि सन्मानाचे जीवन मिळावे, या उदात्त हेतूने कळमनुरीचे आमदार संतोष बांगर यांच्या संकल्पनेतून आणि संपूर्ण स्वतःच्या (खाजगी) खर्चातून 'माऊली वृद्धाश्रम' उभारण्यात येत आहे. हिंगोली शहरातील प्रसिद्ध ओम कयाधू अमृतधारा महादेव मंदिर परिसरात या वृद्धाश्रमाचा भव्य भूमिपूजन सोहळा नुकताच अत्यंत भावूक आणि उत्साही वातावरणात संपन्न झाला.
विशेष म्हणजे, या वृद्धाश्रमाचे भूमिपूजन आमदार संतोष बांगर (MLA Santosh Bangar) यांचे माता-पिता आई श्रीमती वच्छलाबाई लक्ष्मणराव बांगर आणि वडील श्री. लक्ष्मणराव बांगर यांच्या शुभहस्ते करण्यात आले. आपल्याच आई-वडिलांच्या हस्ते या पवित्र कार्याची सुरुवात करून आमदार बांगर यांनी समाजासमोर एक आदर्श निर्माण केला आहे. आमदार संतोष बांगर यांच्या वैयक्तिक खर्चातून उभारल्या जाणार्‍या या 'माऊली वृद्धाश्रमात' वृद्ध लोकांसाठी अत्यंत दर्जेदार आणि सोयी-सुविधांनी युक्त अशी व्यवस्था केली जाणार आहे.
यामध्ये प्रवेश घेणार्‍या प्रत्येक ज्येष्ठ नागरिकाला खालील सुविधा पूर्णपणे मोफत पुरविल्या जातील. वृद्धाश्रमात राहणार्‍या सर्व वृद्धांना रोज पौष्टिक आणि दर्जेदार मोफत जेवण तसेच राहण्याची उत्तम सोय केली जाईल. प्रत्येकाला लागणारे कपडे आणि इतर आवश्यक दैनंदिन वस्तू मोफत दिल्या जातील. आजारपणाच्या काळात त्यांच्यावर मोफत औषधोपचार आणि देखभालीची चोख व्यवस्था असेल. ओम कयाधू अमृतधारा महादेव मंदिराच्या पवित्र आणि निसर्गरम्य परिसरात हे आश्रम असल्याने वृद्धांना मानसिक शांतता आणि भक्तीमय वातावरण लाभेल. या प्रसंगी बोलताना आमदार संतोष बांगर भावूक झाले.
त्यांनी (MLA Santosh Bangar) सांगितले की, 'आजच्या धावपळीच्या युगात अनेक कारणांमुळे काही वृद्ध माता- पित्यांवर एकाकी जीवन जगण्याची वेळ येते. अशा सर्व निराधार वृद्धांना हक्काची सावली आणि कुटुंबाप्रमाणे माया मिळावी, यासाठीच 'माऊली वृद्धाश्रम'ची संकल्पना मी मांडली. माझ्या आई-वडिलांच्या हस्ते याचे भूमिपूजन होणे हा माझ्या आयुष्यातील सुवर्णक्षण आहे. या आश्रमाचा संपूर्ण खर्च मी स्वतः करणार असून, येथील कोणत्याही सुविधेसाठी वृद्धांकडून एक रुपयाही घेतला जाणार नाही.' यावेळी नगराध्यक्षा रेखाताई बांगर गटनेते श्रीराम बांगर उपनगराध्यक्ष माबुद बागवान नगरसेवक सुभाष बांगर गणेश बांगर, नितीन बांगर, कपिल खंडेलवाल, गुड्डू बांगर, विशाल गोटरे, साद अहमद चंदू लव्हाळे, रवींद्र वाढे, खली बांगर, सुमित कांबळे, रामकिशन बांगर, संदीप बांगर, भरत पहेलवान चौधरी उपस्थित होते.
