हिंगोली (MP Nagesh Patil Ashtikar) : शिवसेना उद्धव बाळासाहेब ठाकरे पक्षाला मोठा धक्का बसला आहे. हिंगोलीचे खासदार नागेश पाटील आष्टीकर यांनी थेट ‘ठाकरेंची साथ सोडण्याचा निर्णय घेतला’ अशी प्रतिक्रिया देत राजकीय वर्तुळात खळबळ उडवून दिली आहे. ‘आमच्यावर अविश्वास दाखवला गेला तेव्हाच मी मनाशी ठरवलं होतं’ असे स्पष्ट शब्दांत आष्टीकर यांनी सांगितले. प्रसार माध्यमांना त्यांनी दिलेल्या मुलाखतीत आपली नाराजी बोलून दाखवली. पक्ष नेतृत्वाकडून सातत्याने दुर्लक्ष होत असल्याची भावना त्यांनी व्यक्त केली.
आष्टीकर (MP Nagesh Patil Ashtikar) म्हणाले, ‘आम्ही प्रामाणिकपणे पक्ष वाढवला, मतदारसंघात काम केलं. पण जेव्हा विश्वासच उरला नाही, तेव्हा सोबत राहण्यात अर्थ नाही. कार्यकर्त्यांच्या भावना आणि स्वाभिमान महत्त्वाचा आहे. त्यामुळे ठाकरेंची साथ तोडण्याचा निर्णय घ्यावा लागला.’
हिंगोली लोकसभा मतदारसंघातून मोठ्या मताधिक्याने विजयी झालेले आष्टीकर हे ठाकरे गटाचे निष्ठावंत मानले जात होते. मात्र गेल्या काही महिन्यांपासून पक्षातील अंतर्गत घडामोडींमुळे ते नाराज असल्याची चर्चा होती. अखेर त्यांनीच जाहीरपणे आपली भूमिका स्पष्ट केली आहे.
या प्रतिक्रियेमुळे हिंगोलीसह संपूर्ण मराठवाड्यात राजकीय समीकरणे बदलण्याची शक्यता आहे. आष्टीकर यांच्या पुढील राजकीय वाटचालीकडे आता सर्वांचे लक्ष लागले आहे. ते कोणत्या पक्षात प्रवेश करणार की स्वतंत्र भूमिका घेणार, याबाबत लवकरच चित्र स्पष्ट होईल.
