परभणीत रुढी शिवारातील विहिरीत अनोळखी व्यक्तीचा आढळला मृतदेह

परिसरात खळबळ; ओळख पटविण्याचे मानवत पोलिसांसमोर आव्हान

परभणी (Parbhani Dead body) : मानवत  तालुक्यातील रूढी शिवारातील एका विहिरीत अंदाजे ३४ वर्षीय अनोळखी व्यक्तीचा मृतदेह आढळून आल्याने परिसरात खळबळ उडाली आहे. शनिवार ८ ऑगस्ट रोजी सायंकाळी विहिरीत व्यक्ती बुडत असल्याचे शेतकर्‍यांच्या निदर्शनास आल्यानंतर पोलिसांनी ग्रामस्थांच्या मदतीने शोधमोहीम सुरू केली. मात्र, अंधारामुळे शोधकार्यात अडथळा निर्माण झाल्याने रविवार ९ ऑगस्ट रोजी सकाळी पुन्हा शोधमोहीम राबविण्यात आली. अखेर सकाळी साडेदहा वाजण्याच्या सुमारास मृतदेह विहिरीतून बाहेर काढण्यात यश आले.

रूढी येथील गट क्रमांक १९२ मध्ये छत्रपती पांडुरंग होंडे यांच्या शेतातील विहिरीत शनिवार ८ ऑगस्ट रोजी   सायंकाळी सुमारे पाच वाजता एका अनोळखी व्यक्तीने विहिरीत उडी मारल्याचे शेजारील शेतात काम करणार्‍या शेतकर्‍यांनी पाहिले. (Parbhani Dead body) संबंधित व्यक्ती विहिरीत बुडत असल्याचे लक्षात येताच त्यांनी याची माहिती पोलिसांना दिली. यानंतर पोलीस हवालदार अतुल पंचागे यांनी ग्रामस्थांच्या मदतीने विहिरीत शोधमोहीम सुरू केली. मात्र, अंधार पडल्याने शोधकार्यात अडथळा निर्माण झाला. त्यामुळे रविवार ९ ऑगस्ट रोजी  सकाळी पोलीस निरीक्षक दर्शन शिंदे यांच्या मार्गदर्शनाखाली पोलीस उपनिरीक्षक किशन पतंगे, पोलीस हवालदार शेख जावेद, खंडेराय राऊत तसेच ग्रामस्थांनी पुन्हा शोधमोहीम सुरू केली. सकाळी साडेदहा वाजण्याच्या सुमारास मृतदेह बाहेर काढण्यात आला.

मृत व्यक्तीच्या खिशात कोणतेही ओळखपत्र किंवा कागदपत्र आढळून आले नसल्याने त्याची ओळख अद्याप पटलेली नाही. (Parbhani Dead body) मृतदेह ओळख पटविण्यासाठी मानवत ग्रामीण रुग्णालयात नेण्यात आला आहे. संबंधित व्यक्तीने तणावातून आत्महत्या केली असावी, असा प्राथमिक अंदाज व्यक्त केला जात असून मृत्यूचे नेमके कारण शवविच्छेदन अहवालानंतर स्पष्ट होणार आहे. मृतदेह विहिरीतून बाहेर काढण्याच्या कार्यात रूढीचे सरपंच मुसा कुरेशी, उपसरपंच पिंठू निर्वळ, पोलीस पाटील नारायणराव निर्वळ, विष्णू होंडे, किशन होंडे, छत्रपती होंडे, रामप्रसाद होंडे, नारायण निर्वळ यांच्यासह अनेक ग्रामस्थांनी सहकार्य केले. या घटनेचा पुढील तपास मानवत पोलिसांकडून सुरू असून, अज्ञात व्यक्तीची ओळख पटविण्यासाठी पोलिसांकडून प्रयत्न सुरू आहेत.