जीवरक्षक दल आणि स्थानिक नागरिकांचे तातडीने बचावकार्य
नाशिकच्या प्रसिद्ध रामकुंड परिसरात गोदावरी नदीत स्नान करण्यासाठी उतरलेल्या चार मुलांना अचानक पाण्याचा अंदाज न आल्याने बुडण्याची घटना घडली. प्रसंगावधान राखत स्थानिक नागरिक आणि जीवरक्षक दलाने तातडीने बचावकार्य सुरू केले. या प्रयत्नांत तिघांना सुखरूप बाहेर काढण्यात यश आले. मात्र, १४ वर्षीय गोपाल गुप्ता याचा पाण्यात बुडून मृत्यू झाला. या घटनेमुळे रामकुंड परिसरात काही काळ खळबळ उडाली.
मुंबईहून धार्मिक पर्यटनासाठी नाशिकमध्ये आगमन
मिळालेल्या माहितीनुसार, मूळचे उत्तर भारतीय असलेले आणि मागील काही वर्षांपासून मुंबईत वास्तव्यास असलेले सुमारे ४० जण धार्मिक पर्यटनासाठी नाशिकला आले होते. सकाळी गोदावरी नदीत स्नान केल्यानंतर शिर्डीला जाण्याचे त्यांच्या नियोजन होते. त्यानुसार ग्रुपमधील काही जण रामकुंड परिसरात नदीत स्नानासाठी उतरले.
चार मुलं बुडू लागल्याने गोंधळ
गोदावरीत स्नान सुरू असताना चार मुलं अचानक पाण्यात बुडू लागली. मुलं संकटात सापडल्याचे लक्षात येताच सोबतच्या नागरिकांनी आरडाओरड केली. परिस्थितीची माहिती मिळताच स्थानिक जीवरक्षक दलाने घटनास्थळी धाव घेतली आणि तातडीने बचावकार्य हाती घेतले.
तिघांचा जीव वाचला; गोपाल गुप्ताचा मृत्यू
जीवरक्षक दल आणि स्थानिक नागरिकांच्या प्रयत्नांमुळे चार मुलांपैकी तिघांना पाण्यातून सुखरूप बाहेर काढण्यात आले. त्यांना तत्काळ वैद्यकीय मदत देण्यात आली. मात्र, या दुर्घटनेत गोपाल गुप्ता या १४ वर्षीय मुलाचा बुडून मृत्यू झाला.
धार्मिक पर्यटनासाठी नाशिकला आलेल्या या ग्रुपचा सकाळी गोदावरीत स्नान करून पुढे शिर्डीला जाण्याचा कार्यक्रम होता. मात्र, रामकुंडातील दुर्घटनेमुळे आनंदाच्या या प्रवासाला अचानक दुःखद वळण मिळाले.
नदीत उतरताना काळजी घेण्याचे आवाहन
रामकुंड परिसरात भाविक आणि पर्यटक मोठ्या संख्येने गोदावरी नदीत स्नानासाठी येतात. नदीतील पाण्याची खोली आणि प्रवाहाचा अंदाज प्रत्येक वेळी येईलच असे नाही. त्यामुळे नदीत उतरताना विशेष खबरदारी घेण्याचे तसेच लहान मुलांना एकट्याने पाण्यात न सोडण्याचे आवाहन प्रशासनाकडून करण्यात आले आहे.
