सून गिरिजा राऊत यांच्या तक्रारीनंतर गुन्हा दाखल; अटकपूर्व जामीन अर्जावर मुख्य सुनावणी 23 जुलैला
शिवसेना (ठाकरे गट)चे माजी खासदार विनायक राऊत यांच्याविरोधातील प्रकरणात न्यायालयाच्या निर्णयानंतर त्यांच्या अडचणीत आणखी भर पडली आहे. सून गिरिजा राऊत यांनी केलेल्या तक्रारीच्या आधारे दाखल गुन्ह्यात विनायक राऊत यांनी अटकपूर्व जामिनासाठी न्यायालयात धाव घेतली होती. मात्र, मुख्य सुनावणी 23 जुलै रोजी निश्चित करण्यात आली असून, तोपर्यंत न्यायालयाने कोणतेही अंतरिम संरक्षण देण्यास नकार दिला आहे.
अंतरिम दिलासा न मिळाल्यामुळे तपासाच्या अनुषंगाने पोलिसांना 23 जुलैपूर्वी विनायक राऊत यांना चौकशीसाठी ताब्यात घेण्याचा मार्ग मोकळा झाला आहे. त्यामुळे त्यांना कोणत्याही क्षणी अटकेला सामोरे जावे लागू शकते, अशी माहिती समोर आली आहे.
गिरिजा राऊत यांनी पती गितेश राऊत, सासरे विनायक राऊत आणि सासरच्या इतर सदस्यांविरोधात ठाण्यातील कापूरबावडी पोलीस ठाण्यात तक्रार दाखल केली आहे. या तक्रारीनंतर गुन्हा नोंदविण्यात आला असून, तपास सुरू आहे. माध्यमांशी संवाद साधताना गिरिजा राऊत यांनी प्रकरणाचा सखोल तपास करून न्याय मिळावा, अशी मागणी केली होती.
या प्रकरणात विनायक राऊत यांच्यासह एकूण पाच जणांनी अटकपूर्व जामिनासाठी अर्ज दाखल केला होता. मात्र, न्यायालयाने या अर्जावर अंतरिम संरक्षण देण्यास नकार दिला. त्यामुळे तपास यंत्रणांना आवश्यकतेनुसार संबंधितांची चौकशी करण्याचा अधिकार कायम राहणार आहे. मुख्य जामीन अर्जावरची सुनावणी 23 जुलै रोजी होणार आहे.
गिरिजा राऊत यांनी दिलेल्या तक्रारीत पती गितेश विनायक राऊत, सासरे विनायक राऊत, शामल विनायक राऊत, सुरेखा सरफरे आणि राजेश सरफरे या पाच जणांची नावे नमूद केली आहेत. या सर्वांविरोधात दाखल प्रकरणात न्यायालयाने तत्काळ दिलासा दिलेला नाही.
तक्रारीत गिरिजा राऊत यांनी संततीप्राप्तीसाठी सासरच्या मंडळींकडून अमानुष छळ झाल्याचा आरोप केला आहे. भोंदूबाबांच्या सांगण्यावरून विविध अघोरी प्रकार करण्यात आले, वारंवार गोमूत्र पिण्यास भाग पाडले, तसेच डोक्यावरील केस काढण्यासाठी जबरदस्ती करण्यात आल्याचे आरोपही त्यांनी केले आहेत. या सर्व आरोपांची चौकशी पोलीस करत आहेत.
