परभणी (VNMKV Parbhani) : वसंतराव नाईक मराठवाडा कृषी विद्यापीठाच्या प्रकल्पग्रस्त भरतीची जाहिरात प्रसिद्ध होऊन वर्ष उलटले तरी भरती प्रक्रिया पूर्ण न झाल्याने संतप्त प्रकल्पग्रस्तांनी शुक्रवारी कुलसचिव कार्यालयात केक कापून 'भरतीचा वाढदिवस' साजरा करत विद्यापीठ प्रशासनाच्या निष्क्रिय कारभाराचा अनोख्या पद्धतीने निषेध नोंदविला. यावेळी १४ जुलैपर्यंत भरती प्रक्रिया मार्गी न लागल्यास तीव्र आंदोलन छेडण्याचा इशाराही देण्यात आला.
वसंतराव नाईक मराठवाडा कृषी विद्यापीठांतर्गत प्रकल्पग्रस्त भरतीसाठी सुमारे वर्षभरापूर्वी जाहिरात प्रसिद्ध करण्यात आली होती. मात्र, एक वर्ष उलटूनही भरती प्रक्रिया पूर्ण न झाल्याने प्रकल्पग्रस्त नागरिकांमध्ये तीव्र नाराजी आहे. वारंवार होणाऱ्या दिरंगाईच्या निषेधार्थ प्रकल्पग्रस्तांनी शुक्रवारी विद्यापीठाच्या कुलसचिव कार्यालयात केक कापून 'भरतीचा वाढदिवस' साजरा करत प्रशासनाविरोधात अनोखे आंदोलन केले.
यावेळी आंदोलकांनी विद्यापीठ प्रशासनाच्या निष्क्रिय व गलथान कारभाराचा निषेध व्यक्त केला. तसेच, येत्या १४ जुलैपर्यंत भरती प्रक्रिया पूर्ण न झाल्यास अथवा पुन्हा मुदतवाढ देण्यात आल्यास प्रकल्पग्रस्तांच्या वतीने तीव्र आंदोलन छेडण्यात येईल, असा इशारा निवेदनाद्वारे देण्यात आला.
यासंदर्भातील निवेदन वसंतराव नाईक मराठवाडा कृषी विद्यापीठाचे कुलसचिव तसेच परभणीचे जिल्हाधिकारी यांना देण्यात आले. या निवेदनावर सुनील रणेर, लक्ष्मण शिंदे, श्याम रणेर, अन्सिराम कूट, सोपान ढगे, गोविंद शिंदे, वैभव शिंदे, सय्यद सादात, गजानन शिंदे, आदिनाथ रणेर, स्वप्निल रणेर, दीपक शिंदे, गोपाळ थोरात, हरिपाल थोरात, कृष्णा मोहिते, रामप्रसाद भालेराव, पुंडलिक शिंदे, शिवाजी रणेर, सदाशिव शिंदे, आदित यांच्यासह अन्य प्रकल्पग्रस्त नागरिकांच्या स्वाक्षऱ्या आहेत.
