शिवरस्ता अडीच वर्षांपासून बंद; सरणावर बसून शेतकऱ्याचे बेमुदत उपोषण

भूम (Farmers Hunger Strike) : भूम तालुक्यातील सामनगाव–गणेगाव येथील अडीच वर्षांपासून बंद असलेला शिवरस्ता तातडीने खुला करण्याच्या मागणीसाठी गणेगाव येथील शेतकरी धन्यकुमार नारायण चव्हाण यांनी मंगळवार (दि. ७) पासून संबंधित रस्त्यावरच सरण रचून बेमुदत उपोषण सुरू केले आहे. मुसळधार पावसातही सुरू असलेल्या या आंदोलनामुळे परिसराचे लक्ष या प्रश्नाकडे वेधले गेले आहे.

उपोषणस्थळी लावण्यात आलेल्या बॅनरवर देशाचे पंतप्रधान नरेंद्र मोदी आणि महसूल मंत्री चंद्रशेखर बावनकुळे यांचे छायाचित्र लावण्यात आले आहे. उपोषणकर्ते धन्यकुमार चव्हाण यांनी याप्रकरणी उपविभागीय अधिकाऱ्यांना निवेदन देऊन प्रशासनाकडे वारंवार पाठपुरावा करूनही कोणतीही ठोस कार्यवाही झालेली नसल्याचा आरोप केला आहे. त्यांच्या निवेदनानुसार, सामनगाव–गणेगाव परिसरातील संबंधित शिवरस्ता गेल्या अडीच वर्षांपासून बंद असल्यामुळे शेतकऱ्यांना शेतात ये-जा करण्यासाठी मोठ्या अडचणींचा सामना करावा लागत आहे. खरीप हंगाम सुरू असताना पेरणीसह अन्य कृषी कामांवर त्याचा विपरीत परिणाम होत असून शेतकऱ्यांना आर्थिक नुकसान सहन करावे लागत असल्याचे त्यांनी म्हटले आहे.

रस्ता खुला करण्यासाठी अनेक वेळा संबंधित प्रशासनाकडे तक्रारी करण्यात आल्या. (Farmers Hunger Strike) अधिकृत मोजणीची प्रक्रिया देखील पूर्ण झाली. मात्र, त्यानंतरही प्रत्यक्षात रस्ता मोकळा करण्याबाबत कोणतीही प्रभावी कारवाई करण्यात आली नसल्याचा आरोप चव्हाण यांनी केला आहे. प्रशासनाच्या दिरंगाईमुळे शेतीची कामे ठप्प झाली असून अखेर आंदोलनाचा मार्ग स्वीकारावा लागल्याचे त्यांनी सांगितले.

विशेष म्हणजे, सुरू असलेल्या पावसातही धन्यकुमार चव्हाण यांनी रस्त्यावरच सरण रचून बेमुदत उपोषण सुरू ठेवले आहे. उपोषण सुरू होऊन एक दिवस उलटूनही प्रशासनातील कोणत्याही वरिष्ठ अधिकाऱ्याने आंदोलनस्थळी भेट दिली नसल्याचा आरोप करण्यात आला आहे. त्यामुळे परिसरातील शेतकऱ्यांमध्ये नाराजीचे वातावरण निर्माण झाले आहे.
खरीप हंगामाच्या पार्श्वभूमीवर शिवरस्ता तातडीने खुला करून हा प्रश्न कायमस्वरूपी सोडवावा, अन्यथा आंदोलन अधिक तीव्र करण्यात येईल, असा इशारा उपोषणकर्त्यांनी दिला आहे. आता या आंदोलनावर प्रशासन कोणती भूमिका घेते, याकडे सामनगाव–गणेगाव परिसरातील शेतकरी आणि नागरिकांचे लक्ष लागले आहे.