प्रकाश पोहरे यांच्या नेतृत्वात हजारो शेतकरी सहभागी; धान बोनस, कर्जदार शेतकऱ्यांना २ लाखांची प्रोत्साहन रक्कम आणि २४ तास वीजपुरवठ्याची मागणी
नागभीड : धानाला बोनस आणि उत्पादनाला योग्य मोबदला मिळावा, या प्रमुख मागण्यांसह धान उत्पादक शेतकऱ्यांनी १७ सप्टेंबर रोजी नागभीडमध्ये मोठ्या प्रमाणावर ट्रॅक्टर मोर्चा काढला. शेतकरी नेते प्रकाश पोहरे यांच्या नेतृत्वाखाली झालेल्या या आंदोलनात शेकडो ट्रॅक्टरसह हजारो शेतकरी सहभागी झाले.
तळोधी (बा.) येथील साई मंदिरापासून मोर्चाला सुरुवात झाली. त्यानंतर हा मोर्चा नागभीड तहसील कार्यालयाच्या दिशेने रवाना झाला. ‘धानाला बोनस मिळालाच पाहिजे’ अशा घोषणांनी संपूर्ण परिसर दुमदुमून गेला.
दरम्यान, नागपूर-मुल-गडचिरोली राष्ट्रीय महामार्गावर प्रकाश पोहरे यांच्या नेतृत्वाखाली शेतकऱ्यांनी चक्काजाम आंदोलन केले. त्यामुळे महामार्गावरील वाहतूक काही काळ विस्कळीत झाली होती.
आंदोलनकर्त्या शेतकऱ्यांनी विविध मागण्या प्रशासनासमोर मांडल्या. नियमित कर्जदार शेतकऱ्यांना २ लाख रुपये प्रोत्साहन रक्कम देण्यात यावी, धानाला किमान ४ हजार रुपये प्रतिक्विंटल दर मिळावा आणि शेतीसाठी २४ तास सुरळीत वीजपुरवठा उपलब्ध करून द्यावा, अशी प्रमुख मागणी करण्यात आली. याशिवाय नवीन विद्युत कनेक्शन तातडीने देण्याची मागणीही करण्यात आली.
मोर्चादरम्यान शेतकऱ्यांकडून ‘धानाला बोनस मिळालाच पाहिजे’ तसेच ‘प्रकाश पोहरे आगे बढो, हम तुम्हारे साथ है’ अशा घोषणा देण्यात आल्या. आंदोलनात शेतकरी नेते प्रकाश पोहरे हातात खंजेरी घेऊन दिंडीत सहभागी झाल्याचेही दिसून आले.
या मोर्चातून धान उत्पादक शेतकऱ्यांच्या विविध प्रलंबित मागण्यांकडे प्रशासन आणि शासनाचे लक्ष वेधण्याचा प्रयत्न करण्यात आला. १७ सप्टेंबरच्या मोर्चाबाबत आंदोलनापूर्वीही स्थानिक पातळीवर शेतकऱ्यांच्या मोठ्या सहभागाचे आवाहन करण्यात आले होते.
