२५० दंतचिकित्सकही आरोग्य सेवेत दाखल होणार; आरोग्यमंत्री प्रकाश आबिटकर यांची माहिती
राज्यातील सार्वजनिक आरोग्य व्यवस्था अधिक सक्षम करण्यासाठी डॉक्टरांची मोठ्या प्रमाणावर भरती करण्यात येणार आहे. येत्या काही दिवसांत तब्बल १,४४० डॉक्टरांची नियुक्ती केली जाणार असून, आणखी ६०० डॉक्टरांच्या पदांसाठी जाहिरात प्रसिद्ध करण्यात आली आहे. याशिवाय सुमारे २५० दंतचिकित्सकही लवकरच आरोग्य सेवेत उपलब्ध होणार असल्याची माहिती आरोग्यमंत्री प्रकाश आबिटकर यांनी दिली.
सार्वजनिक आरोग्य विभागाच्या महिला आरोग्य समिती, जन आरोग्य समिती आणि रुग्णकल्याण समितीच्या सदस्यांशी आरोग्यमंत्री प्रकाश आबिटकर यांनी ऑनलाइन ‘जन आरोग्य संवाद’ साधला. या माध्यमातून आतापर्यंत सहा लाखांहून अधिक नागरिकांशी संपर्क साधण्यात आला असून, आगामी काळात आणखी चार लाख नागरिकांपर्यंत पोहोचण्याचे उद्दिष्ट असल्याचे त्यांनी सांगितले. नागरिकांच्या आरोग्याशी संबंधित अडचणी जाणून घेऊन त्यावर आवश्यक कार्यवाही केली जाणार आहे.
‘जन आरोग्य संवाद’दरम्यान आरोग्य समित्यांच्या बैठका नियमितपणे घेतल्या जातात का, डॉक्टर वेळेत रुग्णालयात उपस्थित राहतात का, रुग्णांशी त्यांचा संवाद कसा असतो, तसेच रुग्णालयांमध्ये आवश्यक सुविधा उपलब्ध आहेत का, याबाबत थेट माहिती घेण्यात आली. स्थानिक पातळीवर निर्माण होणाऱ्या समस्या ओळखून त्यावर तातडीने कार्यवाही करण्याला प्राधान्य दिले जाणार असल्याचे आबिटकर यांनी स्पष्ट केले.
नागरिकांना आरोग्य सेवांबाबतच्या तक्रारी थेट प्रशासनापर्यंत पोहोचवता याव्यात, यासाठी लवकरच ऑनलाइन पोर्टल सुरू करण्याची तयारी आहे. या माध्यमातून प्राप्त होणाऱ्या तक्रारींचे निराकरण करण्यासाठी स्वतंत्र आणि प्रभावी यंत्रणा उभारली जाणार आहे.
रुग्णांना सकस आणि पोषक आहार मिळावा यासाठी स्थानिक बचत गटांच्या माध्यमातून व्यवस्था उभारण्याचाही विचार आहे. या माध्यमातून रुग्णालयातील रुग्णांना चांगल्या गुणवत्तेचा आहार उपलब्ध करून देण्याचे नियोजन करण्यात येणार असल्याचे आरोग्यमंत्र्यांनी सांगितले.
दरम्यान, माजी मंत्री सुधीर मुनगंटीवार यांनी आरोग्य विभागाशी संबंधित तक्रारींसाठी स्वतंत्र डिजिटल प्लॅटफॉर्म विकसित करण्याची सूचना केली. तसेच शासकीय रुग्णालये आणि दवाखान्यांमध्ये अनुपस्थित राहणाऱ्या डॉक्टरांच्या कामकाजाचा आढावा घेण्यासाठी आठवड्यातील एक दिवस निश्चित करण्याची शिफारस त्यांनी केली.
मुनगंटीवार यांच्या या सूचनांना आरोग्यमंत्री प्रकाश आबिटकर यांनी सकारात्मक प्रतिसाद दिला. राज्यातील आरोग्य व्यवस्था मजबूत करण्यासाठी निधीची कमतरता पडू दिली जाणार नाही, अशी ग्वाहीही त्यांनी यावेळी दिली.
