परभणी(Parbhani) :- धनगर समाजास एसटी प्रवर्गातून आरक्षण मिळत नाही. यातून नैराश्य आल्याने तालुक्यातील सनपूरी येथील भरत गमाजी बसुले या २४ वर्षीय तरुणाने लिंबाच्या झाडाला गळफास घेऊन आत्महत्या(Suicide) केली. या प्रकरणी ग्रामीण पोलिस ठाण्यात मृत्यूची नोंद करण्यात आली आहे.
परभणीच्या ग्रामीण पोलिस ठाण्यात मृत्यूची नोंद
धनगर समाजाला एसटी प्रवर्गातून आरक्षण देण्याच्या मागणीसाठी गेल्या अनेक वर्षापासून धनगर समाज आग्रही आहे. विविध मार्गाने आंदोलन होत आहे. मात्र प्रश्न प्रलंबित पडल्याने समाजात नैराश्य पसरत आहे. तालुक्यातील सनपूरी येथील भरत बसुले या युवकाने सुध्दा टोकाचे पाऊल उचलल आहे. शनिवार ७ डिसेंबर रोजी गावच्या ओढ्यालगत असलेल्या लिंबाच्या झाडाला गळफास घेऊन आत्महत्या केली. त्याच्या खिशात सापडलेल्या चिट्टीमध्ये धनगर समाजाला एसटी प्रवर्गात आरक्षण मिळत नसल्याने आत्महत्या करत असल्याचे लिहिले आहे. या प्रकरणी मृतकाचा भाऊ भागवत बसुले यांनी दिलेल्या माहितीवरुन ग्रामीण पोलिस ठाण्यात आकस्मात मृत्यूची (sudden death) नोेंद करण्यात आली आहे. अधिक तपास पोह कादरी हे करीत आहेत
