भाटेगाव कालव्यावरील वळण बनले मृत्यूचा सापळा
29 ऑगस्ट रोजी सायंकाळी 5:30 वाजता पपई घेऊन जाणारे बोलेरो वाहन पलटी झाले
डोंगरकडा (National Highway Accident) : राष्ट्रीय महामार्ग क्रमांक- 361 वरील भाटेगाव कालव्यावरील अपघाताची मालिका अखंड सुरूच आहे. आज 29 ऑगस्ट रोजी पपई वाहतूक करणारे बुलेरो वाहन सायंकाळी ठीक 5:30 वाजता पलटी झाले आहे. राष्ट्रीय महामार्ग क्रमांक - 361 हा वारंगा फाटा येथून सुरू होतो . ह्या मार्गावरील अनेक जुने पूल जशास तसे ठेऊन त्याच पुलाला डागडुजी करून कामे केली आहेत आणि जेथे धोक्याची वळणं आहेत ती तशीच ठेऊन टोलनाका मोठ्या थाटात अर्धवट कामे ठेऊन सुरू केला आहे.
भाटेगाव कालव्यावरील अपघातात अनेकांचे प्राण गेले आहेत कित्येकजण जायबंदी झाले आहेत तर शेकडो अपघाताची नोंदच केलेली नाही कारण अपघात झाला की आपसात मिटवून प्रकरण मिटवले आहेत.
दिनांक 27आणि 28 ऑगस्ट ला गोबी वाहतुक करणारे आयशर आणि ट्रक पलटी झाले आणि आज दिनांक 29 ऑगस्ट रोजी पपई वाहतूक करणारे बुलेरो वाहन पलटी झाले यात ड्रॉइव्हर ला किरकोळ दुखापत झाली आहे. वाहन पलटी झाल्याने पुन्हा वाहनांच्या रांगाच रांगा लागल्या होत्या या घटनेची माहिती मिळताच डोंगरकडा पोलीस चोकीचे जमादार संतोष नागरगोजे आणि विठ्ठल जाधव यांनी घटनास्थळी जाऊन वाहतुक सुरळीत केली.
या अपघात स्थळाची हिंगोली जिल्हाधिकारी यांनी स्वतः पाहणी करून येथील धोक्याचे वळण काढून घेण्यासाठी सदरील कंपनीला आदेश द्यावेत अशी मागणी जनतेतून होत आहे.
