औंढा नागनाथ : तालुक्यातील पोटा बुद्रुक येथील युवक गोविंद राधोजी पिंपरकर (२६) यांचा २७ ऑगस्ट रोजी सकाळी औंढा नागनाथ येथील बस स्थानकात मृतदेह आढळून आला. मृत्यूचे कारण स्पष्ट नसले तरी दारूच्या नशेत मृत्यू झाला असावा, असा अंदाज पोलिसांनी व्यक्त केला आहे.
घटनेची माहिती मिळताच औंढा नागनाथ पोलिसांनी घटनास्थळी धाव घेतली. पोलीस निरीक्षक शामकुमार डोंगरे, पोलीस उपनिरीक्षक शेख खुद्दूस, जमादार बबन चव्हाण, शाहेद सय्यद, जयदीप जाधव आणि ओंकारेश्वर रांजणेकर यांनी घटनास्थळी पाहणी केली. त्यानंतर मृतदेह उत्तरीय तपासणीसाठी औंढा नागनाथ ग्रामीण रुग्णालयात नेण्यात आला. उत्तरीय तपासणी केल्यानंतर मृतदेह नातेवाईकांच्या ताब्यात देण्यात आला.
मयत गोविंद पिंपरकर यांना दारूचे व्यसन होते. ते औंढा नागनाथ येथे आले होते. दारूच्या नशेत ते बस स्थानकात थांबले होते. दरम्यान, रात्रीच्या सुमारास त्यांचा मृत्यू झाला असावा. सदरील घटना सकाळी उघडकीस आली. दारूच्या नशेतच मयत गोविंद यांचा मृत्यू झाला असावा, असा अंदाज पोलिसांनी व्यक्त केला आहे.
मयत गोविंद पिंपरकर यांचे लग्न झाले नव्हते. त्यांच्या वडिलांचाही यापूर्वीच मृत्यू झाला आहे. त्यांच्या पश्चात आई आणि भाऊ असा परिवार आहे.
या प्रकरणाचा पुढील तपास जमादार बबन चव्हाण करत आहेत.
