संचेती चौकातील घटनेप्रकरणी BNS कलम २८१ अंतर्गत कारवाई; गणपती मंदिराच्या कार्यक्रमात ताफा गर्दीत अडकल्याने नागरिक-भाविक नाराज
पुणे : केंद्रीय राज्यमंत्री मुरलीधर मोहोळ यांच्या ताफ्याला दुचाकीस्वाराने कट मारल्याची घटना पुण्यातील संचेती चौकात घडली. या प्रकरणी शिवाजीनगर पोलीस ठाण्यात दुचाकीस्वाराविरोधात बेदरकारपणे वाहन चालवल्याचा गुन्हा दाखल करण्यात आला आहे. दरम्यान, श्रीमंत दगडूशेठ हलवाई गणपती मंदिराच्या कार्यक्रमासाठी आलेल्या मंत्र्यांचा ताफा गर्दीत अडकल्याने नागरिक आणि भाविकांनीही नाराजी व्यक्त केली.
संचेती चौकात नेमकं काय घडलं?
१३ सप्टेंबर रोजी रात्री साडेआठच्या सुमारास मुरलीधर मोहोळ यांचा ताफा संचेती चौकातून जात होता. त्यावेळी ताफ्यातील वाहनाला एका दुचाकीस्वाराने वेडीवाकडी पद्धतीने वाहन चालवत कट मारल्याची तक्रार पोलिसांकडे करण्यात आली.
मोहोळ यांच्या अंगरक्षकाच्या कर्तव्यावर असलेले पोलीस उपनिरीक्षक ईश्वर भिकुले यांनी दिलेल्या तक्रारीनुसार, शुभम विजय वनित (वय ३२, रा. नानापेठ) हा दुचाकीस्वार या घटनेत सहभागी असल्याचे नमूद करण्यात आले आहे. मानवी जीवाला धोका निर्माण होईल अशा पद्धतीने वाहन चालवल्याप्रकरणी १४ सप्टेंबर रोजी शिवाजीनगर पोलिसांनी भारतीय न्याय संहितेच्या (BNS) कलम २८१ अंतर्गत गुन्हा दाखल केला.
या प्रकरणात पोलिसांनी संबंधित आरोपीला नोटीस बजावली आहे. पुढील तपास पोलीस उपनिरीक्षक काठे करत आहेत.
दगडूशेठ गणपती मंदिराजवळ ताफा गर्दीत अडकला
दुसरीकडे, श्रीमंत दगडूशेठ हलवाई गणपती मंदिरातील विद्युत रोषणाईच्या उद्घाटन कार्यक्रमासाठी केंद्रीय राज्यमंत्री मुरलीधर मोहोळ उपस्थित होते. कार्यक्रमादरम्यान मध्यवर्ती भागातील मोठ्या गर्दीत मंत्र्यांच्या ताफ्यातील चार वाहने अडकली.
आधीच नागरिक आणि भाविकांची मोठी गर्दी असताना मंत्र्यांचा वाहन ताफा या परिसरात आल्याने वाहतुकीची कोंडी झाली. त्यामुळे सामान्य नागरिक आणि भाविकांना त्रास सहन करावा लागल्याने उपस्थितांकडून नाराजी व्यक्त करण्यात आली.
“एवढ्या गर्दीच्या ठिकाणी मंत्र्यांनी गाड्यांचा ताफा आणायची काय गरज होती?” असा सवाल करत नागरिक आणि भाविकांनी घटनास्थळी तीव्र संताप व्यक्त केला.
दरम्यान, एका बाजूला ताफ्याला दुचाकीस्वाराने कट मारल्याप्रकरणी पोलिसांकडून गुन्हा दाखल करण्यात आला आहे, तर दुसऱ्या बाजूला गर्दीच्या ठिकाणी ताफा अडकल्याने नागरिकांच्या नाराजीला सामोरे जावे लागले आहे.
