12 खासगी आणि 3 सरकारी शाळांना धमकीचे संदेश; प्राथमिक तपासात कोणतीही संशयास्पद वस्तू आढळली नाही
नागपूर : नागपूर शहरात खळबळ उडवणारी घटना समोर आली आहे. शहरातील तब्बल 15 शाळांना ई-मेलद्वारे बॉम्बने उडवून देण्याची धमकी देण्यात आली आहे. यामध्ये 12 खासगी आणि 3 सरकारी शाळांचा समावेश आहे. ही धमकी एका खलिस्तानी संघटनेच्या नावाने ई-मेलद्वारे देण्यात आल्याची प्राथमिक माहिती आहे.
धमकीचा ई-मेल संबंधित शाळांच्या व्यवस्थापनाला मिळाल्यानंतर प्रशासनाने तातडीने पोलिसांना माहिती दिली. घटनेचे गांभीर्य लक्षात घेऊन नागपूर पोलिसांनी त्वरित हालचाली सुरू केल्या. शहरातील संबंधित पोलीस ठाण्यांच्या अधिकाऱ्यांसह सर्व पोलीस निरीक्षकांना घटनास्थळी पाठवण्यात आले.
धमकी मिळालेल्या शाळांमध्ये पोलिसांकडून कसून तपासणी करण्यात येत आहे. शाळेच्या परिसरात, वर्गखोल्या तसेच इतर महत्त्वाच्या ठिकाणी कोणतीही संशयास्पद वस्तू किंवा स्फोटक सामग्री आढळते का, याची तपासणी केली जात आहे.
दरम्यान, पोलिसांच्या प्राथमिक तपासणीत धमकी देण्यात आलेल्या कोणत्याही शाळेत संशयास्पद वस्तू आढळून आलेली नाही. त्यामुळे सध्या ही धमकी खरी आहे की केवळ दहशत निर्माण करण्याच्या उद्देशाने पाठवण्यात आली आहे, याचा तपास पोलिसांकडून केला जात आहे.
ई-मेल नेमका कुठून पाठवण्यात आला, त्यामागे कोणाचा हात आहे आणि खलिस्तानी संघटनेच्या नावाचा वापर का करण्यात आला, याचा शोध घेण्यासाठी सायबर पथकाचीही मदत घेतली जात आहे. ई-मेलचा स्रोत, तांत्रिक माहिती आणि संबंधित डिजिटल पुरावे तपासले जात आहेत.
15 शाळांना एकाच वेळी धमकी मिळाल्याने पालक आणि शाळा प्रशासनामध्ये चिंतेचे वातावरण निर्माण झाले आहे. मात्र, कोणतीही संशयास्पद वस्तू आढळलेली नसल्याने नागरिकांनी घाबरून जाऊ नये, तसेच अफवांवर विश्वास ठेवू नये, असे आवाहन प्रशासनाकडून करण्यात येत आहे.
या प्रकरणाचा तपास नागपूर पोलिसांकडून युद्धपातळीवर सुरू असून, धमकीमागील व्यक्ती किंवा समूहाचा शोध घेण्याचे प्रयत्न सुरू आहेत.
