आखाडा बाळापूर (Illegal liquor stock seized) : येथील पोलीस ठाण्याच्या हद्दीतील बोल्डा बीटमधील बोल्डा शिवारात आज सकाळी दुचाकीवरून नेत असलेला अवैध दारूसाठा जप्त करून एका व्यक्तीविरुद्ध आखाडा बाळापूर पोलीस ठाण्यात गुन्हा दाखल करण्यात आला.
याबाबत मिळालेल्या माहितीनुसार, १२ ऑगस्ट रोजी सकाळी साडेनऊ वाजण्याच्या सुमारास कळमनुरी आणि वसमत तालुक्यांना जोडणाऱ्या मौजे बोल्डा ते पांगरा शिंदे जाणाऱ्या रस्त्यावरील बोल्डा शिवारात स्वतःच्या फायद्यासाठी विनापरवाना विक्रीसाठी देशी दारूची वाहतूक करत असताना स्कूटरसह एका व्यक्तीस स्थानिक गुन्हे शाखेच्या पोलीस पथकाने पकडले.
त्याच्याकडून १५० देशी दारूच्या बाटल्या, किंमत ७,५०० रुपये व स्कूटर, किंमत ८०,००० रुपये असा एकूण ८७ हजार ५०० रुपयांचा मुद्देमाल जप्त करण्यात आला. पोलीस कर्मचारी हरिभाऊ गुंजकर यांच्या फिर्यादीवरून केशव बालाजी शिंदे, रा. पांगरा शिंदे, ता. वसमत यांच्याविरुद्ध गुन्हा दाखल करण्यात आला आहे.
