पोलिस नियंत्रण कक्षात होते कार्यरत; दोन महिन्यांपूर्वी परभणीहून हिंगोलीत झाली होती बदली, आत्महत्येचे कारण अद्याप अस्पष्ट
हिंगोली : हिंगोली जिल्हा पोलिस दलातील पोलिस उपनिरीक्षक अमोल गंगलवाड (वय ५०) यांच्या आत्महत्येच्या घटनेने पोलिस विभागात खळबळ उडाली आहे. हिंगोली पोलिस नियंत्रण कक्षात कार्यरत असलेल्या गंगलवाड यांनी आज सकाळी साडेआठ वाजण्याच्या सुमारास धावत्या रेल्वेसमोर उडी घेत जीवन संपवले. या घटनेमागील कारण अद्याप स्पष्ट झालेले नसून पोलिसांकडून तपास सुरू आहे.
मिळालेल्या माहितीनुसार, अमोल गंगलवाड हे पूर्णा येथून अकोलाकडे जाणाऱ्या रेल्वेची प्रतीक्षा करत होते. रेल्वे जवळ येताच त्यांनी तिच्यासमोर उडी घेतली. या घटनेत त्यांना गंभीर दुखापत झाली आणि त्यांचा घटनास्थळीच मृत्यू झाला.
घटनेची माहिती रेल्वेच्या लोकोपायलटने हिंगोली रेल्वे स्थानकाच्या स्टेशन मास्तरांना दिली. त्यानंतर हिंगोली शहर पोलिसांना घटनेची माहिती देण्यात आली. माहिती मिळताच हिंगोलीचे पोलिस अधीक्षक श्रेणिक लोढा, अतिरिक्त पोलिस अधीक्षक कमलेश मीना यांच्यासह वरिष्ठ पोलिस अधिकारी घटनास्थळी दाखल झाले.
पोलिस अधिकाऱ्यांनी घटनास्थळाची पाहणी करून अमोल गंगलवाड यांचा मृतदेह ताब्यात घेतला. त्यानंतर मृतदेह शवविच्छेदनासाठी रुग्णालयात पाठवण्यात आला.
अमोल गंगलवाड यांची सुमारे दोन महिन्यांपूर्वी परभणी पोलिस दलातून हिंगोली पोलिस दलात बदली झाली होती. हिंगोलीत रुजू झाल्यानंतर ते पोलिस नियंत्रण कक्षात कार्यरत होते. मनमिळाऊ स्वभावाचे आणि कर्तव्यदक्ष अधिकारी म्हणून त्यांची ओळख होती.
दरम्यान, त्यांनी आत्महत्येसारखे टोकाचे पाऊल का उचलले, याबाबत अद्याप कोणतीही अधिकृत माहिती समोर आलेली नाही. घटनास्थळी पोलिसांना कोणतीही सुसाईड नोट आढळलेली नसल्याचे सांगण्यात आले आहे. त्यामुळे आत्महत्येचे नेमके कारण शोधण्यासाठी पोलिसांकडून सखोल तपास केला जात आहे.
