कल्याण लोकसभा मतदारसंघातून लोकसभा निवडणूक लढवलेल्या वैशाली दरेकर यांनी वैयक्तिक कारण देत पदाचा राजीनामा दिला; मातोश्रीवरील बैठकीतील वादानंतर नव्या चर्चांना उधाण
मुंबई : शिवसेना (उद्धव बाळासाहेब ठाकरे) पक्षातील संघटनात्मक घडामोडी पुन्हा एकदा चर्चेत आल्या आहेत. पक्षातील बदल आणि गळतीच्या चर्चांदरम्यान, कल्याण लोकसभा जिल्हा महिला संघटक वैशाली दरेकर राणे यांनी आपल्या पदाचा राजीनामा दिला आहे. त्यांनी वैयक्तिक कारणास्तव पक्षाच्या कामासाठी आवश्यक वेळ देता येत नसल्याचे सांगत पद सोडण्याचा निर्णय घेतला आहे. या घडामोडीनंतर त्या पुढे कोणता राजकीय निर्णय घेणार, याबाबत विविध स्तरांवर चर्चा सुरू झाली आहे.
वैशाली दरेकर राणे यांनी शिवसेना (उद्धव बाळासाहेब ठाकरे) पक्षाकडून कल्याण लोकसभा मतदारसंघात उमेदवारी स्वीकारून विद्यमान खासदार श्रीकांत शिंदे यांच्या विरोधात निवडणूक लढवली होती. आता त्यांनी महिला जिल्हा संघटक पदाचा स्वेच्छेने राजीनामा दिल्याने राजकीय वर्तुळाचे लक्ष या निर्णयाकडे लागले आहे.
राजीनामा पत्रात त्यांनी म्हटले आहे, "साहेब, मी वैशाली दरेकर राणे, महिला जिल्हा संघटक या पदावर गेली दोन वर्षे कार्यरत आहे. मात्र सध्या वैयक्तिक जबाबदाऱ्यांमुळे या पदाला आवश्यक वेळ आणि न्याय देता येत नाही. त्यामुळे मी माझ्या महिला जिल्हा संघटक पदाचा स्वेच्छेने राजीनामा देत असून तो स्वीकारावा, ही विनंती."
दरम्यान, गेल्याच महिन्यात ऑपरेशन टायगर अंतर्गत ठाकरे गटातील सहा खासदारांनी स्वतंत्र गट स्थापन करून उद्धव ठाकरे यांची साथ सोडली होती. त्यानंतर या सर्व खासदारांनी मुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. त्यानंतर राज्यातील विविध जिल्ह्यांमध्येही पक्ष संघटनेत बदल होत असल्याचे चित्र दिसत आहे.
याच पार्श्वभूमीवर काही दिवसांपूर्वी 'मातोश्री' येथे ठाणे जिल्ह्यातील पक्ष संघटनेचा आढावा घेण्यासाठी महत्त्वाची बैठक आयोजित करण्यात आली होती. कळवा आणि कल्याण मतदारसंघातील संघटनात्मक आढावा तसेच नव्या पदाधिकाऱ्यांच्या नियुक्तीवर चर्चा सुरू असताना दोन गटांमध्ये तीव्र शाब्दिक वाद झाल्याची माहिती समोर आली होती.
सूत्रांच्या माहितीनुसार, कल्याणमधील काही पदाधिकाऱ्यांच्या हकालपट्टीच्या मुद्द्यावरून बैठकीत वातावरण तापले. हा प्रकार पाहून पक्षप्रमुख उद्धव ठाकरे यांनी तीव्र नाराजी व्यक्त करत उपस्थित पदाधिकाऱ्यांची कानउघाडणी केल्याचे सांगितले जाते. या सर्व घडामोडींमुळे ठाकरे गटातील अंतर्गत संघटनात्मक परिस्थिती पुन्हा चर्चेचा विषय ठरली आहे.
