परभणी (Parbhani) :- पूर्णा तहसीलदारांनी पकडलेला अवैध वाळूचा (Illegal sand) टिप्पर जबरदस्तीने घेऊन जात तहसीलदारांची कॉलर पकडून दमदाटी करणे टिप्पर चालक व मालकास चांगलेच महागात पडले. जिल्हा व सत्र न्या. श्रीमती के.एफ.एम. खान यांनी दोघांना प्रत्येकी सहा महिन्याचा साधा कारावास, अशी शिक्षा शुक्रवार २ मे रोजी सुनावली आहे.
टिप्परचालक, मालकास सहा महिन्याचा कारावास परभणी
सदर खटल्याबाबत अधिक माहिती अशी की, पूर्णा तहसील कार्यालयाचे तत्कालिन तहसीलदार शाम राजन्ना मदनुरकर यांनी कानडखेड शिवारात गोदापात्रातून अवैध वाळू उपसा करुन वाहतुक करणारा टिप्पर पकडला होता. या प्रकरणी २९ जानेवारी २०१८ रोजी पूर्णा पोलिस ठाण्यात फिर्यादही दिली होती. या फिर्यादीत नमुद करण्यात आले होते की, अवैध वाळू वाहतुक करणारा टिप्पर पकडल्यानंतर चालक राजू गोविंद जटाळे व मालक राजु सोळंके यांनी तहसीलदार मदनुरकर यांच्याशी हुज्जत घालत नगर परिषदेच्या डंम्पीग ग्राऊंडवर टिप्पर रिकामा केला. टिप्पर मालक राजु सोळंके याने तहसीलदारांची कॉलर पकडत धक्काबुक्की करुन टिप्पर जबरदस्तीने घेऊन गेले. सदर गुन्ह्याचा तत्कालिन पोनि. सुनिल ओव्हळ यांनी तपास पूर्ण करुन दोषारोप पत्र दाखल केले. सदर प्रकरणात सरकार पक्षातर्फे ९ साक्षीदार तपासण्यात आले. तदर्थ जिल्हा व सत्र न्यायधिश के.एफ.एम. खान मॅडम यांनी सर्व साक्षीपुराव्याचे अवलोकन करुन २ मे रोजी आरोपी राजेश उर्फ राजु साळुंखे, राजु गोिंवद पाटोळे यांना भादंवी कलम ३५३ अन्वये दोषी ठरवून दोघांना प्रत्येकी ६ महिने साधा कारावास (imprisonment) अशी शिक्षा ठोठावली.
या खटल्यात मुख्य सरकारी अभियोक्ता अॅड. ज्ञानोबा दरोड, सुहास कुलकर्णी यांच्या मार्गदर्शनाखाली अति. सरकारी अभियोक्ता देवयानी देशपांडे यांनी बाजू मांडली. तसेच जिल्हा पोलिस अधिक्षक रविंद्रसिंह परदेशी, अप्पर पोलिस अधिक्षक यशवंंत काळे यांच्या मार्गदर्शनाखाली कोर्ट पैरवी अधिकारी पोउपनि. सुरेश चव्हाण, अंमलदार प्रमोद सुर्यवंशी, पोह.राजू दहिफळे, वंदना आदोडे यांनी काम पाहिले.