ठाणे, सातारा, सोलापूर, सांगलीसह बीड, हिंगोली, परभणी आणि अमरावती न्यायालयांना धमकीचे मेल; BDDS, श्वानपथक आणि सायबर पोलिसांकडून कसून तपासणी
महाराष्ट्रातील आठ जिल्ह्यांमधील न्यायालयांना एकाच दिवशी बॉम्बस्फोटाची धमकी मिळाल्याने राज्याच्या सुरक्षा यंत्रणांमध्ये मोठी खळबळ उडाली आहे. सोमवारी ठाणे, सातारा, सोलापूर, सांगली, बीड, हिंगोली, परभणी आणि अमरावती येथील जिल्हा व सत्र न्यायालयांना धमकीचे ई-मेल प्राप्त झाले. या संदेशांमध्ये न्यायालयीन इमारती बॉम्बने उडवून देण्याची धमकी देण्यात आली होती. घटनेचे गांभीर्य लक्षात घेऊन न्यायालय प्रशासनाने तातडीने पोलिसांना माहिती दिली. त्यानंतर न्यायालयांमधील कामकाज थांबवून संपूर्ण इमारती रिकाम्या करण्यात आल्या.
सुरक्षेच्या दृष्टीने न्यायाधीश, वकील, कर्मचारी आणि न्यायालयीन कामकाजासाठी आलेल्या पक्षकारांना तातडीने बाहेर काढण्यात आले. त्यानंतर पोलिसांसह बॉम्ब शोधक व नाशक पथकांनी न्यायालयांच्या परिसराची तपासणी सुरू केली. या प्रकारामुळे विविध जिल्ह्यांतील न्यायालयांमध्ये काही काळ भीती आणि गोंधळाचे वातावरण निर्माण झाले.
ठाणे, साताऱ्यात पोलिसांची तातडीने धाव
ठाणे जिल्हा न्यायालयाला धमकीचा ई-मेल मिळताच ठाणे नगर पोलिसांनी घटनास्थळी पोहोचून सुरक्षा व्यवस्था कडक केली. न्यायालय परिसरातील नागरिकांची ये-जा नियंत्रित करण्यात आली. सातारा जिल्हा न्यायालयालाही अशाच स्वरूपाचा संदेश मिळाल्यानंतर पोलिसांनी बॉम्ब शोधक पथकाच्या मदतीने संपूर्ण इमारतीची तपासणी सुरू केली.
सोलापूर जिल्हा न्यायालयातही धमकीचा मेल प्राप्त झाल्यानंतर वरिष्ठ पोलीस अधिकारी तातडीने दाखल झाले. खबरदारीचा उपाय म्हणून संपूर्ण परिसर रिकामा करण्यात आला.
बीड, हिंगोली आणि अमरावतीतही तपासणी
बीड जिल्हा व सत्र न्यायालयातील वरिष्ठ न्यायाधीशांना धमकीचा ई-मेल मिळाल्यानंतर न्यायालय परिसरात एकच धावपळ उडाली. वकील आणि पक्षकारांनी सुरक्षिततेसाठी इमारतीबाहेर धाव घेतली. त्यामुळे परिसरात मोठी गर्दी आणि गोंधळ निर्माण झाला.
हिंगोलीमध्ये धमकीचा संदेश मिळताच शासकीय यंत्रणा सतर्क झाली. बॉम्ब शोधक पथकाने न्यायाधीशांच्या चेंबरपासून न्यायालयातील विविध दालनांपर्यंत सखोल तपासणी केली. अमरावती जिल्हा व सत्र न्यायालयातही पोलिसांनी तातडीने सुरक्षा व्यवस्था वाढवून संपूर्ण इमारतीची झाडाझडती घेतली.
सांगली आणि परभणीत श्वानपथक तैनात
सांगली आणि परभणी येथील जिल्हा न्यायालयांनाही बॉम्बस्फोटाच्या धमकीचे ई-मेल मिळाले. यानंतर स्थानिक पोलीस, बॉम्ब शोधक व नाशक पथक आणि श्वानपथक घटनास्थळी दाखल झाले. न्यायालयातील प्रत्येक महत्त्वाच्या भागाची तपासणी करण्यात येत आहे.
धमकीचा स्रोत शोधण्याबरोबरच कोणतीही अनुचित घटना घडू नये, यासाठी सर्व संबंधित जिल्ह्यांमध्ये पोलीस बंदोबस्त वाढवण्यात आला आहे.
सायबर पोलिसांकडून ई-मेलचा उगम शोधण्याचे प्रयत्न
एकाच वेळी आठ जिल्ह्यांतील न्यायालयांना धमकीचे संदेश पाठवण्यात आल्याने या प्रकरणाकडे विशेष गांभीर्याने पाहिले जात आहे. बॉम्ब शोधक व नाशक पथके (BDDS), श्वानपथके आणि स्थानिक पोलिसांकडून न्यायालयीन इमारतींची तपासणी केली जात आहे.
दुसरीकडे, धमकीचे ई-मेल नेमके कुठून पाठवण्यात आले, त्यामागे कोणाचा हात आहे आणि या प्रकारामागे एखादी संघटित टोळी किंवा असामाजिक घटक आहेत का, याचा शोध घेण्यासाठी संबंधित जिल्ह्यांचे सायबर पोलीस सक्रिय झाले आहेत.
प्राथमिक तपासात हा प्रकार केवळ खोडसाळपणा आहे की यामागे एखादा मोठा कट आहे, या दोन्ही शक्यतांचा विचार करून तपास सुरू आहे. धमकीमध्ये नमूद केल्याप्रमाणे प्रत्यक्षात कोणताही स्फोटक धोका आहे का, याचीही सुरक्षा यंत्रणांकडून पडताळणी केली जात आहे.
