Hingoli :- हिंगोली शहरासह जिल्हाभरात होळी व धुलीवंदनाच्या दिवशी रंगाचा बेरंग करणाऱ्यांवर कडक कारवाई केली जाईल असा इशारा पोलीस अधीक्षक श्रीकृष्ण कोकाटे यांनी दिला आहे. हिंगोली जिल्ह्यात 13 मार्चला होळी (Holi) व 14 मार्चला धुलीवंदनाच्या पार्श्वभूमीवर जिल्हा पोलीस अधीक्षक कोकाटे यांनी सांगितले की, हिंगोली शहरासह जिल्ह्यात मोठा पोलीस बंदोबस्त राहणार आहे. अप्पर पोलीस अधीक्षक अर्चना पाटील, पोलीस अधीक्षक राजकुमार केंद्रे, सुरेश दळवे, गुन्हे शाखेचे पोलीस निरीक्षक विकास पाटील यांचे स्वतंत्र पथक कार्यरत राहील. याशिवाय स्थानिक गुन्हे शाखेचे पथकही कार्यरत राहणार आहे.
ब्रीथ अनालायझरद्वारे वाहन चालकांची तपासणी केली जाईल
याशिवाय जिल्ह्यातील संवेदनशील भागात राज्य राखीव दलाचे जवान तैनात केले जाणार असून दोन दंगा काबू पथक तैनात केले जातील. याशिवाय जिल्हाभरात ६४ अधिकारी, ३९० पोलीस कर्मचारी, ५३० गृह रक्षक दलाचे जवान, एक दहशतवाद विरोधी पथक व दोन बॉम्ब शोध व नाशक पथक गस्तीवर राहणार आहे. याशिवाय जिल्हाभरात दुचाकी व चारचाकी वाहनांची तपासणी मोहीम सुरू केली जाणार आहे. वाहनांमध्ये अवैधरित्या मद्य (Illegal alcohol) वाहतूक करणाऱ्यांवर कडक कारवाई केली जाईल. तसेच ब्रीथ अनालायझरद्वारे वाहन चालकांची तपासणी केली जाईल. मध्ये पिऊन वाहन चालवणाऱ्यांवरही गुन्हे दाखल केले जातील. दरम्यान होळीच्या पार्श्वभूमीवर पाच जणांवर हद्दपारची कारवाई करण्यात आल्याचेही त्यांनी सांगितले. याशिवाय आणखी काही जणांवर लवकरच हद्दपारची कारवाई (action) केली जाणार असल्याचे त्यांनी स्पष्ट केले.
