खोपोलीतील उत्पादनाच्या लेबलवरून निर्माण झाला होता वाद; '7 Years Old Blended' उल्लेखावरही आक्षेप, FSSAI च्या मंजुरीनंतरच विक्रीचा मार्ग मोकळा होणार
मुंबई : महाराष्ट्रातील मद्यप्रेमींना लोकप्रिय ओल्ड मॉन्क रम पुन्हा उपलब्ध होण्याची प्रतीक्षा असतानाच या प्रकरणात महत्त्वाची घडामोड समोर आली आहे. ओल्ड मॉन्कचे उत्पादन करणाऱ्या कंपनीने मुंबई उच्च न्यायालयातील याचिका मागे घेण्याचा निर्णय घेतला आहे. आता नव्या लेबलसह अन्न सुरक्षा आणि मानक प्राधिकरणाकडे (FSSAI) पुन्हा मंजुरीसाठी जाण्याची तयारी कंपनीने केली आहे. त्यामुळे महाराष्ट्रातील ओल्ड मॉन्कच्या विक्रीवरील निर्बंध कधी हटणार, याबाबत उत्सुकता वाढली आहे.
महाराष्ट्रात गेल्या काही महिन्यांपासून या ब्रँडच्या विक्रीवर परिणाम झाला आहे. ओल्ड मॉन्कचे उत्पादन रायगड जिल्ह्यातील खोपोली येथे केले जाते. याच उत्पादन केंद्राची FSSAI अधिकाऱ्यांनी तपासणी केली होती. त्यानंतर मे-जून महिन्यापासून राज्यातील या ब्रँडच्या विक्रीचा प्रश्न निर्माण झाला. उत्पादनाच्या गुणवत्तेपेक्षा बाटलीवरील लेबल आणि त्यावरील माहिती हा या वादाचा मुख्य मुद्दा ठरला.
नेमका काय आहे ओल्ड मॉन्कच्या लेबलचा वाद?
FSSAI च्या निरीक्षणानुसार, ओल्ड मॉन्क तयार करताना न्यूट्रल स्पिरिटमध्ये बाहेरून रमचा स्वाद मिसळला जातो. मात्र, बाटलीवरील लेबलवर उत्पादन तयार करण्याच्या या प्रक्रियेचा स्पष्ट उल्लेख नसल्याचा आक्षेप प्राधिकरणाने घेतला होता. केवळ रमचा फ्लेवर मिसळल्यामुळे संबंधित मद्याला रम म्हणून संबोधता येणार नाही, अशी भूमिका FSSAI ने मांडली होती.
एखाद्या मद्याला रम म्हणून मान्यता मिळण्यासाठी त्यामध्ये रमची निर्धारित वैशिष्ट्ये असणे आवश्यक असल्याचे प्राधिकरणाचे म्हणणे आहे. याशिवाय बाटलीवर छापण्यात आलेल्या '7 Years Old Blended' या उल्लेखावरही FSSAI ने प्रश्न उपस्थित केले होते.
दुसरीकडे, कंपनीने आपले उत्पादन लागू असलेल्या नियमांचे पालन करूनच तयार केले जात असल्याचा दावा केला होता. या वादावर तोडगा काढण्यासाठी कंपनीने ऑगस्ट महिन्यात मुंबई उच्च न्यायालयात याचिका दाखल केली होती.
नव्या लेबलला FSSAI ची मंजुरी मिळणार का?
आता कंपनीने न्यायालयीन लढाई पुढे न नेण्याचा निर्णय घेत याचिका मागे घेतली आहे. त्याऐवजी उत्पादनाच्या लेबलमध्ये आवश्यक बदल करून नव्या लेबलसह FSSAI कडे मंजुरीसाठी जाण्याचा मार्ग स्वीकारण्यात आला आहे.
कंपनीकडून सादर करण्यात येणाऱ्या नव्या लेबलची FSSAI कडून तपासणी केली जाईल. त्यानंतरच उत्पादनाच्या विक्रीबाबत पुढील निर्णय घेतला जाणार आहे. त्यामुळे ओल्ड मॉन्कची विक्री महाराष्ट्रात तातडीने सुरू होण्याची शक्यता नाही. प्राधिकरणाची मंजुरी मिळाल्यानंतरच राज्यातील विक्री पुन्हा सुरू होण्याबाबत स्पष्टता येईल.
त्यामुळे आता कंपनीच्या नव्या लेबल प्रस्तावाकडे आणि FSSAI च्या निर्णयाकडे ओल्ड मॉन्कच्या चाहत्यांचे लक्ष लागले आहे.
