प्रदीप पुर्णेकर हत्या प्रकरणावर संजय राऊतांचा गंभीर आरोप; ‘हत्येचे सूत्रधार शिंदे गटात’, फडणवीसांच्या राजीनाम्याची मागणी

मीनाक्षी शिंदे, त्यांच्या कुटुंबीयांवर राऊतांचा आरोप; बिल्डर आणि ड्रग्स रॅकेटविरोधातील संघर्षाचा केला उल्लेख

ठाण्यात शिवसेना (उद्धव बाळासाहेब ठाकरे) गटाचे विभागप्रमुख प्रदीप पुर्णेकर यांच्या हत्येनंतर राजकीय वातावरण चांगलेच तापले आहे. मंगळवारी रात्री मनोरमानगर परिसरात अज्ञात हल्लेखोरांनी पुर्णेकर यांच्यावर गोळीबार केला. गंभीर जखमी अवस्थेत त्यांना रुग्णालयात दाखल करण्यात आले; मात्र उपचारादरम्यान त्यांचा मृत्यू झाला. पोलिसांकडून या प्रकरणाचा तपास सुरू असून सीसीटीव्ही फुटेजसह विविध बाजू तपासल्या जात आहेत.

या घटनेनंतर ठाकरे गटाचे खासदार संजय राऊत यांनी पत्रकार परिषद घेत राज्यातील कायदा-सुव्यवस्थेवर प्रश्न उपस्थित केले. पुर्णेकर यांच्या हत्येमागील सूत्रधार शिंदे गटाशी संबंधित असल्याचा आरोप राऊत यांनी केला. मात्र, या आरोपांची अद्याप पोलिसांकडून पुष्टी झालेली नाही आणि हत्येचा नेमका हेतू तपासातून स्पष्ट होणे बाकी आहे.

#WATCH | Mumbai, Maharashtra: Shiv Sena (UBT) MP Sanjay Raut says, "... Our Shiv Sena worker, Pradeep Purnekar, was murdered last night, and a curfew has been imposed in Thane. The situation is extremely serious. Five murders have taken place in Thane city in the recent past,… pic.twitter.com/2wU9Lf0S9u

— ANI (@ANI) September 30, 2026

राऊत यांच्या म्हणण्यानुसार, प्रदीप पुर्णेकर यांनी यापूर्वी निवडणूक लढवली होती आणि त्यांचा थोड्या मतांनी पराभव झाला होता. त्यानंतर माजी महापौर मीनाक्षी शिंदे यांच्यासोबत त्यांचा राजकीय संघर्ष सुरू असल्याचा दावा त्यांनी केला. मनोरमानगर परिसरात बिल्डरांच्या माध्यमातून नागरिकांना बेघर करण्याचा प्रयत्न सुरू असल्याचे पुर्णेकर सांगत होते आणि त्या विरोधात ते लढत होते, असेही राऊत यांनी नमूद केले.

मनोरमानगरमध्ये बिल्डरांना वसाहती उभारायच्या होत्या, असा आरोप करत पुर्णेकर यांनी त्याला विरोध केल्याचे राऊत यांनी सांगितले. याचबरोबर संबंधित भागावर ड्रग्स रॅकेटर्सचा प्रभाव असल्याचा आणि या रॅकेटला शिंदे गटातील काही लोकांचा पाठिंबा असल्याचा दावाही त्यांनी केला. या ड्रग्स रॅकेटविरोधात पुर्णेकर यांनी सातत्याने आवाज उठवला आणि पोलिसांकडे तक्रारी केल्या, असे राऊत म्हणाले.

संजय राऊत यांनी पुर्णेकर यांच्या हत्येसाठी मीनाक्षी शिंदे, त्यांचे कुटुंबीय आणि त्यांच्याशी संबंधित असल्याचा दावा केलेल्या गुंडांवर थेट आरोप केले. या प्रकरणात संबंधित सूत्रधारांवर कारवाई करण्याची मागणी त्यांनी केली. दरम्यान, पुर्णेकर यांच्या कुटुंबीयांनीही मीनाक्षी शिंदे आणि त्यांच्या पतीवर जुन्या वादाच्या पार्श्वभूमीवर संशय व्यक्त केल्याचे वृत्त आहे.

या हत्याकांडाच्या पार्श्वभूमीवर राऊत यांनी राज्याचे गृहमंत्री देवेंद्र फडणवीस यांच्या कारभारावरही टीका केली. ठाण्यातील कायदा-सुव्यवस्था नियंत्रणात ठेवण्यात सरकार अपयशी ठरत असल्याचा आरोप करत त्यांनी फडणवीस यांच्या राजीनाम्याची मागणी केली. ठाण्याच्या पोलीस आयुक्तांवरही कारवाई करण्याची मागणी राऊत यांनी केली.

दरम्यान, पोलिसांनी या प्रकरणात तपास सुरू केला असून हल्लेखोरांचा शोध घेण्यासाठी सीसीटीव्ही फुटेज तपासले जात आहे. हल्लेखोरांनी चेहरा झाकला होता आणि घटनास्थळावरून ते पसार झाल्याची माहिती समोर आली आहे. हत्येमागे राजकीय वैमनस्यासह वैयक्तिक शत्रुत्वाच्या शक्यतेचाही तपास केला जात असल्याचे पोलिसांनी सांगितले आहे.